මීගොඩ දන්සල් පෝලිමේ ඛේදවාචකය: පුද්ගලයින් 6කට මරු කැඳවූ කැබ් රථයේ සැකකරුවන් යළි රිමාන්ඩ්! මුදලින් වන්දි ගෙවීමටත් නියෝග!

පසුගිය වෙසක් පොහෝ දින මීගොඩ ප්‍රදේශයේ පැවති දන්සලක පෝලිමේ රැඳී සිටි පිරිසක් මතට කැබ් රථයක් ධාවනය වීමෙන් පුද්ගලයින් 6 දෙනෙකුට ජීවිත අහිමි වීමේ ඛේදවාචකයට අදාළව බන්ධනාගාරගත කර සිටි සැකකරුවන් සිව් දෙනා යළි රක්ෂිත බන්ධනාගාරගත කර තිබේ.

අදාළ සැකකරුවන් අද (16) හෝමාගම මහේස්ත්‍රාත් අධිකරණය වෙත ඉදිරිපත් කළ අවස්ථාවේදී, හෝමාගම මහේස්ත්‍රාත් රජින්ද්‍රා ජයසූරිය මහත්මිය විසින් මෙම නියෝගය නිකුත් කරනු ලැබුවාය.

අද දින අධිකරණ විභාගයේදී මෙම අනතුරින් මියගිය එක් පුද්ගලයෙකුගේ පාර්ශ්වයකට රුපියල් ලක්ෂයක (100,000) වන්දි මුදලක් ලබා දීමට විත්තිය කටයුතු කර තිබුණි. ඊට අමතරව, මියගිය අනෙක් පුද්ගලයින් පස්දෙනා වෙනුවෙන් ද රුපියල් ලක්ෂය බැගින් වන්දි මුදල් ලබා දීමට විත්තිකාර පාර්ශ්වය එහිදී සිය එකඟතාව පළ කර සිටියේය.

මෙම ඛේදනීය සිදුවීමට අදාළව මේ වන විටත් සිදු කෙරෙන විමර්ශනවල ප්‍රගතිය ලබන නඩු දිනයේදී අධිකරණයට වාර්තා කරන ලෙසට නියෝග කළ මහේස්ත්‍රාත්වරිය, අදාළ සැකකරුවන් සිව්දෙනා එළඹෙන 30 වැනිදා දක්වා තවදුරටත් රක්ෂිත බන්ධනාගාරගත කිරීමට නියෝග කළාය.