සෞදි අරාබියේ වෙසෙන ශ්‍රී ලාංකිකයින්ට හදිසි දැනුම්දීමක්

සෞදි අරාබියේ පවතින වත්මන් තත්ත්වය සලකා බලමින් එරට වෙසෙන ශ්‍රී ලාංකිකයින්ට විශේෂ ආරක්ෂිත උපදෙස් මාලාවක් ජෙඩාහි ශ්‍රී ලංකා කොන්සල් ජනරාල් කාර්යාලය මඟින් නිකුත් කර තිබේ.

ජංගම දුරකථනයට ජාතික හදිසි අනතුරු ඇඟවීමක් (National Warning Alert) ලැබුණු වහාම ගොඩනැගිල්ලක් තුළ ආරක්ෂිත ස්ථානයකට යොමුවන ලෙස දැනුම් දී ඇත.

මෙම උපදෙස් මාලාවට අනුව ජනේල, වීදුරු, බැල්කනි සහ පාලම්වලින් ඈත්ව සිටීම, මිනිසුන් ගැවසෙන ස්ථානවලට නොයාම, සිදුවීම් වීඩියෝ කිරීම හෝ සමාජ මාධ්‍ය වෙත එක්කිරීමෙන් වැළකීම සහ නිල නොවන තොරතුරු හුවමාරු නොකිරීම අනිවාර්ය වේ.

වාහන ධාවනය කරමින් සිටියදී අනතුරු ඇඟවීමක් ලැබුණහොත් සුදුසු ස්ථානයක වාහනය නවත්වා ආරක්ෂා වන ලෙසත්, හදිසි අවස්ථාවකදී මක්කා සහ මදීනා කලාපවල සිටින අය 911 අංකය ද අනෙකුත් ප්‍රදේශවල සිටින අය 998 අංකය ද අමතන ලෙසත් කොන්සල් කාර්යාලය වැඩිදුරටත් දැනුම් දෙයි.