කොරියාවේ ඛේදවාචකය සිදු වී පැය 24ක් යන්නට මත්තෙන් ඉන්දියාවෙනුත් ඛේදවාචකයක් වාර්තා වෙයි! පාලමක් කඩා වැටී 60කට අධික පිරිසක් මරුට!

ඉන්දියාවේ ගුජරාට් ප්‍රාන්තයේ කේබල් පාලමක් කඩා වැටීමෙන් සිදුවූ අනතුරකින්
පුද්ගලයන් 60කට වැඩි පිරිසක් මියගොස් තිබෙනවා.

වසර 100ක් පමණ පැරණි මෙම පාලම අද පස්වරු 6.40ට පමණ කඩා වැටී ඇති බවයි ඉන්දීය මාධ්‍ය වාර්තා කළේ.

ඉන්දීය මාධ්‍ය වාර්තා සඳහන් කරන්නේ අනතුරින් 60කට අධික පිරිසක් මේ වන විටත් මියගොස් ඇති බවයි.

සාත් පූජාවට අදාළ චාරිත්‍ර කිහිපයක් ඉටු කිරීම සඳහා 500ක පමණ පිරිසක් පාලම මතින් ගමන් කිරීමේදී මෙම අනතුර සිදුව තිබෙනවා.

විදෙස් මාධ්‍ය වාර්තාවලට අනුව, 100 දෙනෙකු පමණ තවමත් කඩා වැටුණු සුන්බුන් අතර ගඟේ සිරවී සිටින බවටයි සැක කෙරෙන්නේ.

මියගිය පිරිසගෙන් වැඩි දෙනෙකු කාන්තාවන් සහ ළමුන් බව ප්‍රදේශවාසීන් සඳහන් කරනවා.
තවත් 17 දෙනෙකු බේරාගෙන රෝහල් ගත කර ඇති බවයි වාර්තා වන්නේ.

මේ අතර මෙම ඛේදවාචකයෙන් ජීවිත අහිමි වූ පුද්ගලයන්ගේ පවුල්වලට ශෝකය ප්‍රකාශ කරන අතර ගුජරාට් ප්‍රාන්ත රජය විසින් මියගිය එක් අයෙකුගේ පවුලට රුපියල් ලක්ෂ 4ක් සහ තුවාල ලැබූවන්ට රුපියල් 50,000ක් ලබා දෙන බව ප්‍රකාශ කර තිබෙනවා.