හෙට සිට වෙනස්වන කාලගුණය

උතුරු සහ දකුණු අර්ධ ගෝලවලින් පැමිණෙන සුළං එකිනෙක මුණගැසෙන ‘අන්තර් නිවර්තන අභිසාරී කලාපය’ (ITCZ) දිවයිනේ කාලගුණයට බලපෑම් කරමින් පවතින බැවින් හෙට (06) සිට වැසි තත්ත්වයේ වැඩිවීමක් බලාපොරොත්තු වන බව කාලගුණවිද්‍යා දෙපාර්තමේන්තුව පවසයි.

අද පස්වරු 1.00න් පමණ පසුව දිවයිනේ බොහෝ ප්‍රදේශවල වැසි හෝ ගිගුරුම් සහිත වැසි ඇති විය හැක.

බස්නාහිර, සබරගමුව, දකුණු, ඌව පළාත්වල සහ අම්පාර දිස්ත්‍රික්කයේ අහස වලාකුළින් බරව පවතින අතර එම ප්‍රදේශවලට උදෑසන කාලයේදීත් වැසි ඇති විය හැකි බව කාලගුණ නිවේදනයේ සඳහන් වේ.

බස්නාහිර, සබරගමුව, ඌව, නැගෙනහිර පළාත්වල සහ ගාල්ල, මාතර, පොළොන්නරුව දිස්ත්‍රික්කවල ඇතැම් ස්ථානවලට මි.මී. 50 ඉක්මවූ තරමක තද වැසි ඇති විය හැක.

මීට අමතරව උතුරු, උතුරු-මැද සහ හම්බන්තොට දිස්ත්‍රික්කයේ විටින් විට පැයට කිලෝමීටර් 30-40 දක්වා වන තරමක තද සුළං ද බලාපොරොත්තු විය හැක.

ගිගුරුම් සහිත වැසි සමඟ ඇතිවිය හැකි තාවකාලික තද සුළං සහ අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස කාලගුණවිද්‍යා දෙපාර්තමේන්තුව ජනතාවගෙන් ඉල්ලා සිටී.