තානාපති ධුරයෙන් ඉවත්වීමට හේතු කියන මහින්ද සමරසිංහ

තමාට සක්‍රීය දේශපාලනයට යළි පිවිසීමේ කිසිදු අදහසක් නොමැති බව අමෙරිකා එක්සත් ජනපදයේ හිටපු ශ්‍රී ලංකා තානාපති මහින්ද සමරසිංහ මහතා පවසයි.

වසර පහකට ආසන්න කාලයක් සේවය කිරීමෙන් පසු පෞද්ගලික හේතූන් මත තමා තානාපති ධුරයෙන් ඉවත් වූ බවත්, ඉවත් වන ලෙස රජයෙන් කිසිදු බලපෑමක් නොතිබූ බවත් ඔහු අවධාරණය කරයි.

අමෙරිකා එක්සත් ජනපදයේ ශ්‍රී ලංකා තානාපති ධුරයෙන් මෑතකදී ඉවත් වූ මහින්ද සමරසිංහ මහතා, අස්ගිරි පාර්ශ්වයේ මහනායක අතිපූජ්‍ය වරකාගොඩ ශ්‍රී ඤාණරතන මහා නාහිමිපාණන් සහ මල්වතු පාර්ශ්වයේ මහනායක අතිපූජ්‍ය තිබ්බටුවාවේ ශ්‍රී සුමංගල මහා නාහිමිපාණන් ඊයේ (09) බැහැදැක ආශීර්වාද ලබාගත් අවස්ථාවේ දී ඒ මහතා මෙම අදහස් පළ කර තිබේ.

තම තානාපති කාලය තුළ ශ්‍රී ලංකා – අමෙරිකානු සබඳතා ශක්තිමත් කිරීමටත්, ජාත්‍යන්තර මූල්‍ය අරමුදලේ (IMF) ගිවිසුම් සඳහා අමෙරිකාවේ සහය ලබා ගැනීමටත්, අමෙරිකාව විසින් පනවන ලද බදු 10% ක සීමාවක රඳවා ගැනීමටත්, එරටින් නාවික යාත්‍රාවක් සහ හෙලිකොප්ටර් කිහිපයක් ලබා ගැනීමටත් කටයුතු කළ බව සමරසිංහ මහතා සිහිපත් කළේය.

වසර 27ක් පාර්ලිමේන්තු මන්ත්‍රීවරයෙකු ලෙස සේවය කර තිබුණද, තවදුරටත් දේශපාලනයේ නිරත නොවීමට තීරණය කර ඇති බව ඔහු සඳහන් කළේය.

කෙසේ වෙතත්, ජාත්‍යන්තර කටයුතු සම්බන්ධයෙන් රජයෙන් ඉල්ලීමක් කළහොත් සහයෝගය ලබා දීමට තමා තවදුරටත් සූදානම් බව ඔහු පැවසීය.

එමෙන්ම, සක්‍රීය දේශපාලනයෙන් ඉවත් වී සිටින හෙයින් වත්මන් දේශපාලන තත්ත්වය පිළිබඳව අදහස් දැක්වීමට සූදානම් නොමැති බවද හිටපු තානාපතිවරයා වැඩිදුරටත් සඳහන් කළේය.

මහින්ද සමරසිංහ මහතා විසින් රාජ්‍ය තාන්ත්‍රික සේවයේදී ඉටු කරන ලද විශිෂ්ට සේවය මල්වතු සහ අස්ගිරි පාර්ශ්වයන්හි මහානාහිමිවරුන් විසින් දැඩි ඇගයීමකට ලක් කර තිබේ.