ක්‍රිකට් ක්‍රිඩකයන්ට රතු එළි! වසරටම පිටරට ලීග් දෙකයි!

ශ්‍රී ලංකා ජාතික ක්‍රිකට් ක්‍රීඩකයන් වසරක් තුළ සහභාගී වන ෆ්‍රැන්චයිස් ලීග් තරගාවලි සංඛ්‍යාව, ලංකා ප්‍රීමියර් ලීග් (LPL) තරගාවලිය ද ඇතුළත්ව උපරිම තුනකට සීමා කිරීමට අදාළව නව දැඩි රෙගුලාසි හඳුන්වා දීමට ශ්‍රී ලංකා ක්‍රිකට් ආයතනය සූදානම් වේ.

කොළඹදී පැවැති මාධ්‍ය හමුවකට එක්වෙමින් ශ්‍රී ලංකා ක්‍රිකට් පරිවර්තන කමිටු සාමාජික සිදත් වෙත්තමුණි මහතා මේ බව සඳහන් කළේය. ක්‍රීඩකයන් සිය ජාතික කණ්ඩායමේ වගකීම්වලට මුල්තැන ලබා දෙන බව තහවුරු කිරීම සඳහා මෙම නව රෙගුලාසි දැඩි ලෙස බලාත්මක කරන බව ඔහු අවධාරණය කළේය. මීට පෙරද මෙවැනි සීමා පැනවුවද, ඒවා නිසි ලෙස ක්‍රියාත්මක නොවීම හේතුවෙන් ඇතැම් ක්‍රීඩකයන් අවසර ලත් සීමාව ඉක්මවා තරගාවලි සඳහා සහභාගී වී ඇති බව හෙතෙම පෙන්වා දුන්නේය.

නව යෝජිත රෙගුලාසිවල ප්‍රධාන කරුණු:

• වාර්ෂික ලීග් සීමාව: ලංකා ප්‍රීමියර් ලීග් (LPL) තරගාවලියද ඇතුළත්ව වසරකට සහභාගී විය හැක්කේ උපරිම ෆ්‍රැන්චයිස් ලීග් තරගාවලි තුනකට පමණි.
• ජාතික තරග සඳහා පෙර පැමිණීම අනිවාර්යයි: ජාතික මට්ටමේ තරගාවලියක් ආරම්භ වීමට අවම වශයෙන් දින 10කට පෙර ක්‍රීඩකයන් දිවයිනට පැමිණීම අනිවාර්ය කර ඇති අතර, ඒ හරහා තරග සඳහා ප්‍රමාණවත් සූදානමක් ලබාගත හැක.
• අනුමැතිය සඳහා යෝග්‍යතා පරීක්ෂණ: විදේශීය ෆ්‍රැන්චයිස් තරගාවලි සඳහා අනුමැතිය සහතික කිරීමේ ක්‍රියාවලිය දැඩි කෙරෙන අතර, එහිදී ක්‍රීඩකයන්ගේ ශාරීරික යෝග්‍යතා මට්ටම් ප්‍රධාන සාධකයක් වනු ඇත.

ක්‍රීඩකයන්ගේ ශාරීරික යෝග්‍යතාව ඉහළ නැංවීම, අධික තරගකාරී කාර්යභාරය (Workload) නිසි ලෙස කළමනාකරණය කිරීම සහ ජාතික කණ්ඩායමේ නියෝජනයට ඉහළම ප්‍රමුඛතාව ලබාදීම මෙම නව සංශෝධනවල මූලික අරමුණ වී තිබේ.