ශ්‍රී ලංකාවට එරෙහි පාකිස්තාන ටෙස්ට් සංචිතය නම් කෙරේ

ශ්‍රී ලංකා කණ්ඩායම සමග පැවැත්වීමට නියමිත තරග 2කින් යුත් ටෙස්ට් ක්‍රිකට් තරගාවලිය සඳහා වන 14 දෙනෙකුගෙන් යුත් පාකිස්තාන සංචිතය එරට ක්‍රීඩා තේරීම් කමිටුව විසින් නම් කර ඇත.

බාබර් අසාම්ගේ නායකත්වයෙන් යුතුව නම් කර ඇති මෙම සංචිතය සඳහා වෙනස්කම් කිහිපයක්ම සිදු කර ඇත.

ඒ අනුව ඉකුත් අගෝස්තු මාසයේ පැවැති එංගලන්ත සංචාරය අතරතුරදී කණ්ඩායමෙන් ඉවත් කරනු ලැබ සිටි සල්මන් අලි අගා සහ අලි උස්මාන් යළිත් කණ්ඩායමට කැඳවා තිබේ.

මීට අමතරව දේශීය තරගබිමේ දස්කම් අතරට පිවිසි නවක ක්‍රීඩකයින් තිදෙනෙකුටද මෙම සංචිතයේ පළමු වරට ඉඩ ලබා දී තිබීම විශේෂත්වයකි.

ඒ අනුව 26 හැවිරිදි තුන්ඉරියව් ක්‍රීඩක මොහොමඩ් ටහා, මැදපෙළ පිතිකරුවෙකු වන 27 හැවිරිදි මොහොමඩ් සුලේමාන් සහ 19 හැවිරිදි ආරම්භක පිතිකරුවෙකු වන සමීර් මින්හාස් යන ක්‍රීඩකයින් නවකයන් ලෙස සංචිතයට එක්කර ඇත.

දෙරට අතර පළමු තරගය එළැඹෙන නොවැම්බර් 9 වැනිදා රාවල්පින්ඩිහිදී ආරම්භ වීමට නියමිතය. එමෙන්ම දෙවන හා අවසන් තරගය නොවැම්බර් 17 සිට 21 දක්වා ලාහෝර්හි ගඩාෆි ක්‍රීඩාංගණයේදී පැවැත්වෙනු ඇත.

ශ්‍රී ලංකාවට එරෙහි පාකිස්තාන ටෙස්ට් සංචිතය

බාබර් අසාම් (නායක), අබ්දුල්ලා ෆසාල්, අලි උස්මාන්, අරෆත් මින්හාස්, අසාන් අවායිස්, මොහොමඩ් අබ්බාස්, මොහොමඩ් ගාසි ගෝරි (කඩුලු රකින්නෙකු), මොහොමඩ් සුලේමාන්, මොහොමඩ් ටාහා, රසාවුල්ලා, සාද් බෙග් (කඩුලු රකින්නෙකු), සල්මන් අලි අගා, සමීර් ෂා මින්හාස්, සවුඩ් බේග්