ක්‍රිකට් ක්‍රීඩකයන්ට දැඩි විනය නීති මාලාවක් පනවයි! දුරකථන භාවිතා තහනම ඇතුළු කරුණු රැසක් ඒ අතරට!

ශ්‍රී ලංකා ක්‍රිකට් ආයතනය විසින් ක්‍රීඩකයින් සහ කාර්ය මණ්ඩලයට නව මාර්ගෝපදේශ කිහිපයක් ක්‍රියාත්මක කිරීමට නියමිතව තිබෙනවා.

ශ්‍රී ලංකා ක්‍රිකට් ප්‍රතිරූපය ආරක්ෂා කර ගැනීමට සහ ක්‍රීඩක විනය, වෘත්තීය භාවය රැකගැනීම වෙනුවෙන් හඳුන්වා දී ඇති මෙම නව මාර්ගෝපදේශ මගින් ක්‍රීඩක ඇඳුම් පැලඳුම්, ගමන් බිමන්, සමාජ මාධ්‍ය භාවිතය වැනි අංශ රැසක් පිළිබඳ අවධානය යොමු කර තිබීම විශේෂත්වයක්.

ක්‍රීඩකයින් සහ කාර්ය මණ්ඩලයට විවිධ අවස්ථා සඳහා නිශ්චිත ඇඳුම් පැලඳුම් භාවිත කිරීම අනිවාර්ය කර ඇති බව සඳහන්.

ඒ අනුව කණ්ඩායම් ඡායාරූපයක් ගැනීමේ දී සපයා ඇති කමිස, කලිසම් සහ බ්ලේසරය පැලඳීම අනිවාර්ය වන අතර තරගය කාසියේ වාසිය, ජාතික ගීය, සම්මාන පිරිනැමීම වැනි අවස්ථා වෙනුවෙන් ක්‍රීඩා ඇඳුම් පැලඳීම ද අනිවාර්ය කර තිබෙනවා.

මෙම අවස්ථාවල ක්‍රීඩක වෘත්තීයභාවය ආරක්ෂා කර ගැනීම වෙනුවෙන් කොට කලිසම් සහ සෙරෙප්පු පැලඳීම තහනම් වනු ඇති.

එමෙන්ම තරග සංචාරවලදී SLC විසින් සපයා දෙන බෑග් රැගෙන යා යුතු අතර, වෙනත් තුන්වන පාර්ශවයක් අනුග්‍රාහකත්වය ලබාදෙන නිෂ්පාදන හෝ ලාංඡන ඇති දෑ පැලඳීම ද තහනම්.

ක්‍රීඩාවට ඇති අවධානය රැකගැනීම වෙනුවෙන් තරගාවලි අතරතුර සමාජ මාධ්‍ය භාවිතය, වීඩියෝ ක්‍රීඩා භාවිතය, රාත්‍රී චිත්‍රපට නැරඹීම හා ඒ හා සමාන ක්‍රියාවන් වෙනුවෙන් සීමා පනවා ඇති අතර, SLC අවසරය රහිතව සමාජ මාධ්‍ය වෙත අදහස් ලබා දීම, සම්මුඛ සාකච්ඡා ලබාදීම ද තහනම් කර තිබෙනවා.

මාධ්‍ය සාකච්ඡා සඳහා ද කණ්ඩායම් කළමනාකරු විසින් නම් කරන ලද අය, අදාළ ඇඳුම් පැලඳ සහභාගීවීම අනිවාර්ය වනු ඇති.

ක්‍රීඩකයින්ට සහ කාර්ය මණ්ඩලයට තරගාවලි අතරතුර සහ සංචාරවලට යන අතරතුර සිය කළමනාකරුවන් හමුවීමට අවසර හිමි නොවන අතර කණ්ඩායම් රැස්වීම් සඳහා සහභාගී වීමට ද ක්‍රීඩක කළමනාකරුවන් ට අවකාශයක් හිමි වන්නේ නැහැ.

තරග සංචාර ආරම්භ වීමට සති දෙකකට පෙර කණ්ඩායම් කළමනාකරු විසින් අදාළ ගමන් විස්තර ක්‍රීඩකයින්ට ලබාදීමට නියමිත අතර, ඔවුන් ඒවා කොන්දේසි විරහිතව පිළිගත යුතුයි.

එමෙන්ම තරග දින සහ පුහුණු කාලසීමා තුළ දුරකථන භාවිතය ද ඔවුන්ට තහනම් වනවා.

විදෙස් සංචාර සඳහා ක්‍රීඩකයින්ට දිනකට ඇමරිකානු ඩොලර් 150ක දීමනාවක් සහ දේශීය තරගාවලි පැවැත්වෙන දින සඳහා දිනකට ඇමරිකානු ඩොලර් 100ක් පිරිනැමෙන අතර, ඒවා ඔවුන්ගේ ආහාරපාන වෙනුවෙන් ලබාදෙන දීමනා වනු ඇති.

ඒ අනුව එම මුදල් ඉතිරි කරගැනීම වෙනුවෙන් හිතාමතාම ආහාර ගැනීමෙන් වැළකීම තහනම් කර තිබෙනවා.

එමෙන්ම විදෙස් තරග සංචාරවල දී 80Kg බරක් රැගෙන යා හැකි අතර, කණ්ඩායම් කළමනාකරුගේ අනුමැතිය සහිතව තවත් 20Kg රැගෙන යා හැකි නමුත්, එය තරග සංචාරයට අදාළ භාණ්ඩ රැගෙන යෑම සඳහා පමණක් වලංගු වනු ඇති.

ගුවන් චාරිකා සහ කාලසටහන් විශේෂ හේතුවක දී හැරුණු කොට සෑමවිටම කණ්ඩායම් සාමාජිකයින් සහ කාර්ය මණ්ඩලය එක්ව ගමන් ගත යුතුයි.

එමෙන්ම දෛනික පුහුණු කාලසටහන කණ්ඩායම් පුහුණුකරු, කළමනාකරු සහ නායකයා විසින් තීරණය කරන අතර, එම කාලසටහන පිළිපැදීම අනිවාර්ය වනවා.

ඒවාට අනුගත නොවීම, නැවත ශ්‍රී ලංකාවට පිටත් කර හැරීමට හේතු විය හැකියි.

දින 20 ඉක්මවන දීර්ඝ තරගාවලිවල දී සංචාරයේ අවසන් දින 12ක කාලය තුළ තම බිරිඳ සහ වයස අවුරුදු 5ට වැඩි දරුවන් ගෙන්වා ගත හැකි නමුත්, ඒවාට අදාළ වියදම් සියල්ල ක්‍රීඩකයා විසින් දැරිය යුතු වනවා.

එමෙන්ම ඒ හැර වෙනත් කිසිම සමීපතමයකු හෝ නෑදෑයන් සංචාරයට එක් කර ගැනීම තහනම් වනු ඇති.

මෙම මාර්ගෝපදේශ කඩ කිරීම මගින් ක්‍රීඩකයින්ට සහ කාර්ය මණ්ඩලයට දැඩි දඬුවම් හිමි විය හැකියි.

එහි දී ඇමරිකානු ඩොලර් 10,000ක් දක්වා දඩ මෙන්ම, කණ්ඩායමෙන් ඉවත් කිරීම, නැවත හරවා යැවීම වැනි තීරණවලට හේතු විය හැකි බවට ශ්‍රී ලංකා ක්‍රිකට් ආයතනය විසින් අවධාරණය කර තිබෙනවා. (මූලාශ්‍රය – දිවයින)