අස්වැසුම ගන්නවා කියන්නේ නීත්‍යනුකූලව හිඟාකනවා වගේ වැඩක් – අමාත්‍ය සුනිල් හදුන්නෙත්ති

අස්වැසුම වැනි සහන ලැබීම පිළිබඳව සමාජයක් වශයෙන් ලැජ්ජාවට පත් විය යුතු බවත් මෙම සහනාධාරය ලබා ගැනීම “නීත්‍යානුකූලව හිඟා කනවා වැනි ක්‍රියාවක්” බවත් කර්මාන්ත අමාත්‍ය සුනිල් හඳුන්නෙත්ති මහතා පවසනවා.

උත්සව අවස්ථාවකට එක්වෙමින් අමාත්‍යවරයා සඳහන් කළේ, මෙම වැඩසටහන හරහා සිදුවන්නේ රජයේ මුදල් එනම් පොදු මුදල් ලබා ගැනීමක් වන බැවින්, අත්‍යවශ්‍යම නොවන අය මෙයට ඇබ්බැහි වීම රටකට අහිතකර බවයි.

තම ආණ්ඩුව සෑම දිනකම අස්වැසුම බෙදීමට පැමිණ නැති බවට පැවසූ අමාත්‍යවරයා, අස්වැසුම ලබා ගැනීම පුරුද්දක් බවට පත් වූ විට, එය ජනතාව තුළ යැපෙන මානසිකත්වයක් ඇති කරන බව එහිදී අවධාරණය කළා.

මෙරට අස්වැසුම සහනාධාර ලබාදීම අවසන් වූ දිනට තමන්ට සතුටු විය හැකි බවට පෙන්වාදුන් සුනිල් හඳුන්නෙත්ති මහතා කියා සිටියේ, එලෙස සිදු වුවත් එය බලෙන් නැති කිරීමට අවශ්‍යතාවයක් නොමැති බවයි.

රටක් හෝ පුද්ගලයෙක් ලෙස සාර්ථක වීමට නම්, ප්‍රථමයෙන් මෙම සහනාධාර මත යැපෙන මානසිකත්වයෙන් මිදිය යුතු බව සුනිල් හඳුන්නෙත්ති මහතා පවසනවා.