ගුවන් අනතුරකින් ලිබියානු යුද හමුදාපති මරුට

තුර්කියේ අන්කාරා නුවර ආසන්නයේ සිදුවූ ගුවන් අනතුරකින් ලිබියානු යුද හමුදාපති මොහොමඩ් අලි අහ්මඩ් අල් හඩාඩ් මියගොස් ඇත.

අන්කාරා සිට ලිබියාවේ ට්‍රිපොලි බලා පියාසර කරමින් සිටියදී, හමුදා උසස් නිලධාරීන් සිවුදෙනෙකු සහ කාර්ය මණ්ඩල සාමාජිකයින් තිදෙනෙකු රැගත් පෞද්ගලික ජෙට් යානය අනතුරට ලක්ව ඇති අතර, අනතුරින් එහි සිටි සියලුදෙනාම මරණයට පත්ව තිබේ.

අනතුරට පෙර යානයේ නියමුවන් තාක්ෂණික දෝෂයක් පිළිබඳ ගුවන් පාලක මධ්‍යස්ථානයට දන්වා හදිසි ගොඩබැස්වීමකට උත්සාහ කර තිබුණද, එයට පෙර යානය අනතුරට ලක්ව ඇති බව වාර්තා වේ.

සිද්ධිය සම්බන්ධයෙන් වැඩිදුර විමර්ශන කටයුතු ක්‍රියාත්මකය.

දෙරට අතර ආරක්ෂක සහයෝගීතාව පිළිබඳ ඉහළ මට්ටමේ සාකච්ඡා සඳහා අල් හඩාඩ් තුර්කියට පැමිණ සිටි අතර, ඔහුගේ අභාවය සම්බන්ධයෙන් ලිබියානු රජය තෙදින ශෝක කාලයක් ප්‍රකාශයට පත් කර ඇත.