ආණ්ඩුවේ ගුණ වයන හිටපු ඇමති අලි සබ්‍රි

ලෝකයේ පවතින වත්මන් යුදමය වාතාවරණය හමුවේ ඉන්ධන කළමනාකරණය සඳහා QR කේත ක්‍රමය (Fuel Pass) හඳුන්වා දීම ඉතාමත් යහපත් තීරණයක් බව හිටපු අමාත්‍ය අලි සබ්‍රි මහතා පවසයි. ඊයේ (27) පැවැති ප්‍රවෘත්ති සාකච්ඡාවකට එක්වෙමින් ඒ මහතා මෙම අදහස් පළ කළේය.

පවතින අර්බුදකාරී තත්ත්වය හමුවේ යම් කාලයකට පාරිභෝජනය සීමා කිරීම හෝ සංකෝචනය කිරීම අත්‍යවශ්‍ය බව පෙන්වා දුන් හිටපු අමාත්‍යවරයා, එලෙස පාරිභෝජනය සීමා කළ ද එමගින් රටේ සමස්ත ආර්ථිකය සංකෝචනය නොවීමට රජය වගබලා ගත යුතු බව අවධාරණය කළේය.

කෙසේ වෙතත්, ඉන්ධන පිරිමැසීමේ අරමුණින් රජය විසින් සෑම බදාදා දිනකම ප්‍රකාශයට පත් කර ඇති විශේෂ නිවාඩු දිනය සම්බන්ධයෙන් තමා එකඟ නොවන බව අලි සබ්‍රි මහතා ප්‍රකාශ කළේය. සතිය මැද දිනයක රාජකාරි කටයුතු නැවැත්වීමෙන් සතියේ ඉලක්කගත වැඩ කොටසට බාධා ඇති වන බවත්, එය රටේ ආර්ථිකයට ඍණාත්මක ලෙස බලපාන බවත් ඔහු පෙන්වා දුන්නේය.

“සතිය මැද නිවාඩු ලබාදීමෙන් වැඩ ප්‍රමාණය අතපසු වෙනවා. ඒ නිසා බදාදා නිවාඩු ලබාදීමේ තීරණය සම්බන්ධයෙන් රජය නැවත සලකා බැලිය යුතුයි,” යනුවෙන් හිටපු අමාත්‍යවරයා වැඩිදුරටත් සඳහන් කළේය.