ශ්‍රී ලංකා ක්‍රිකට් කණ්ඩායමට 5%ක දඩයක්

පාකිස්තානයේ පැවැත්වෙන තුන්කොන් ක්‍රිකට් තරගාවලියේදී එංගලන්තයට එරෙහිව පැවති තරගයේ නියමිත කාලය තුළ පන්දුවාර සංඛ්‍යාව අවසන් කිරීමට අපොහොසත් වීම හේතුවෙන් ශ්‍රී ලංකා කණ්ඩායමට තරග ගාස්තුවෙන් 5%ක දඩයක් පැනවීමට ජාත්‍යන්තර ක්‍රිකට් කවුන්සිලය (ICC) පියවර ගෙන තිබේ.

පසුගිය ඔක්තෝබර් 29 වැනිදා ලාහෝර්හිදී පැවති මෙම තරගයේදී නියමිත කාලය අවසන් වන විට ශ්‍රී ලංකා කණ්ඩායම එක් පන්දුවාරයක් පිටුපසින් සිටීම මෙම තීරණයට හේතු වී ඇත.

තරගයේදී ශ්‍රී ලංකා කණ්ඩායම වෙනුවෙන් නායකත්වය දැරූ කුසල් මෙන්ඩිස් අදාළ වරද පිළිගෙන තිබේ. ඒ අනුව සිද්ධිය සම්බන්ධයෙන් විධිමත් විභාගයක් පැවැත්වීම අවශ්‍ය නොවන බව ICCය සඳහන් කර ඇත.

තරග තීරක ජෙෆ් ක්‍රෝ විසින් මෙම දඩ මුදල නියම කර තිබේ.

ICC චර්යාධර්ම සංග්‍රහයේ 2.22 වගන්තියට අනුව, සීමිත පන්දුවාර තරගවලදී නියමිත කාලය තුළ පන්දුවාර සංඛ්‍යාව යැවීමට අපොහොසත් වන කණ්ඩායම්වල ක්‍රීඩකයන්ට ප්‍රමාද වන සෑම පන්දුවාරයක් වෙනුවෙන්ම තරග ගාස්තුවෙන් 5%ක දඩයක් පැනවිය හැකිය.

මෙම සිද්ධියට අදාළ පැමිණිල්ල තරග විනිසුරුවන් වන අහ්සාන් රසා සහ ෂර්ෆුද්දෝලා ඉබ්නේ ෂාහිද්, තෙවැනි විනිසුරු වේන් නයිට්ස් සහ සිව්වැනි විනිසුරු නසීර් හුසේන් විසින් ඉදිරිපත් කර තිබේ.