පළමු ටෙස්ට් තරගයෙන් ශ්‍රී ලංකාවට දැවැන්ත පරාජයක්

සංචාරක ශ්‍රී ලංකා කණ්ඩායම සමග පැවැති පළමු ටෙස්ට් ක්‍රිකට් තරගය ලකුණු 233කින් ජය ගැනීමට දකුණු අප්‍රිකාව අද (30) සමත් වුනා.

දකුණු අප්‍රිකාවේ ඩර්බන්හි පැවැති මෙම තරගයේ පළමුවට පන්දුවට පහර දුන් දකුණු අප්‍රිකානු කණ්ඩායම සියලු දෙනා දැවී ලකුණු 191ක් වාර්තා කළා.

එහි දී ශ්‍රී ලංකාව වෙනුවෙන් පන්දු යැවීමේ දී ලහිරු කුමාර සහ අසිත ප්‍රනාන්දු කඩුලු 3 බැගින් දවා ගත් අතර, විශ්ව ප්‍රනාන්දු සහ ප්‍රභාත් ජයසූරිය කඩුලු 2 බැගින් දවා ගත්තා.

සිය පළමු ඉනිම ක්‍රීඩා කළ ශ්‍රී ලංකා කණ්ඩායම රැස් කිරීමට හැකි වූයේ ලකුණු 42ක් පමණි.

ඒ ශ්‍රී ලංකා කණ්ඩායම ටෙස්ට් ක්‍රිකට් ඉතිහාසයේ ඉනිමක දී වාර්තා කළ අඩුම ලකුණු සංඛ්‍යාව ලෙස වාර්තා පොත් අතරට එක්වුණා.

අනතුරුව පිටියට සිය දෙවැනි ඉනිම සඳහා පිවිසි දකුණු අප්‍රිකානු කණ්ඩායම කඩුලු 5ක් පමණක් දැවී ලකුණු 366කට සිය ඉනිම අත්හිටවූයේ, ජයග්‍රහණයට සඳහා ශ්‍රී ලංකා කණ්ඩායමට ලකුණු 516ක දැවැන්ත ඉලක්කයක් ලබා දෙමින්.

ශ්‍රී ලංකා දෙවන ඉනිමට යම්කිසි ජවයක් එක් කිරීමට දිනේෂ් චන්දිමාල්, ධනංජය ද සිල්වා හා කුසල් මෙන්ඩිස් සමත් වුණා.

දිනේෂ් චන්දිමාල් අද වාර්තා කළේ සිය ටෙස්ට් ක්‍රිකට් දිවියේ 30 වැනි අර්ධ ශතකය රැස් කළ අතර ඔහු ලකුණු 83ක් රැස් කළේය.

කෙසේ නමුත් එම දායකත්වයන් ශ්‍රී ලංකාවට තරගයේ ජයග්‍රහණය සඳහා ප්‍රමාණවත් නොවූ අතර ශ්‍රී ලංකා දෙවෙනි ඉනිම ලකුණු 282කට සීමා විය.

ඒ අනුව ශ්‍රී ලංකාවට ලකුණු 233ක පරාජයකට මුහුණ දීමට සිදු වුණා.