සිසුවෙකුගේ යතුරු පැදියේ හැපී කාන්තාවකගේ කකුලේ කොටසක් ගැලවෙයි! සිසුවා එය කැළයකට විසි කරලා!

යතුරුපැදි අනතුරකට සම්බන්ධව පහළොස් හැවිරිදි පාසල් සිසුවකු අක්මීමන පොලිසිය විසින් පෙරේදා (ජූලි 24) අත්අඩංගුවට ගෙන තිබේ. මෙම සිද්ධියෙන් කාන්තාවකගේ පාදයක් වළලුකරට ඉහළින් සිරුරෙන් වෙන් වී ඇත.

අත්අඩංගුවට ගත් සැකකරු ආනන්දගොඩ, වැවේගොඩවත්ත ප්‍රදේශයේ පදිංචි 16 හැවිරිදි පාසල් සිසුවෙකි.

අනතුරට ලක්වූ 40 හැවිරිදි කාන්තාව අක්මීමන, හපුගේ වත්ත, දෙනිය වත්ත ප්‍රදේශයේ පදිංචිකාරියක් වන අතර, ඇය මේ වන විට ගාල්ල කරාපිටිය ශික්ෂණ රෝහලේ ප්‍රතිකාර ලබමින් සිටියි.

පොලිසිය සඳහන් කරන පරිදි, අනතුර සිදුව ඇත්තේ හිමිදුම්ගොඩ පාසල අසලදීය.

මාර්ගයේ ගමන් කරමින් සිටි කාන්තාව මෙලෙස අනතුරට ලක්ව ඇති අතර, අනතුරින් කාන්තාවගේ එක් පාදයක් වළලුකරට ඉහළින් වෙන් වී තිබෙනවා.

එලෙස වෙන් වූ පාදයේ කොටස යතුරුපැදියේ ඇමිනී ඇති අතර, ඒ බව නොදැන යතුරුපැදිය ද රැගෙන අදාළ සිසුවා එම ස්ථානයෙන් පළාගොස් ඇති බවයි වාර්තා වන්නේ.

යතුරුපැදිය ද සමඟ පළා ගිය පාසල් සිසුවා නිවසට පැමිණි පසු යතුරුපැදියේ ඇමිනී තිබූ පාදයේ කොටස දැකඇති අතර, පසුව ඔහු එය රෙදි කැබැල්ලක ඔතා කැලයකට විසිකර යතුරුපැදිය සෝදා පිරිසිදු කර ඇති බවයි පොලිසිය සඳහන් කළේ.

අනතුර සම්බන්ධයෙන් විමර්ශන ඇරඹු අක්මීමන පොලිසිය සැකකාර පාසල් සිසුවා නිවස තුළ සැඟව සිටිය දී අත්අඩංගුවට ගැනීමටයි කටයුතු කර ඇත්තේ.

සිසුවාගෙන් විමසීමෙන් අනතුරුව පාද කොටස සොයාගෙන ගාල්ල කරාපිටිය ශික්ෂණ රෝහල වෙත රැගෙන ගොස් ඇත. කෙසේ වෙතත්, පාද කොටස රෝහලට ගෙන ඒමට ප්‍රමාද වීම හේතුවෙන් එය නැවත බද්ධ කිරීමට නොහැකි බව වෛද්‍යවරුන් විසින් දැනුම් දී ඇත.

අක්මීමන පොලිසිය සිද්ධිය සම්බන්ධයෙන් වැඩිදුර විමර්ශන පවත්වයි.