රාමසාන් උපවාස කාලය හෙට ඇරඹෙයි

රී ලංකාවාසී මුස්ලිම් ජනතාව හෙට (19) සිට රාමසාන් උපවාසය ආරම්භ කරන බව කොළඹ මහ පල්ලිය නිවේදනය කළේය. අද (18) සන්ධ්‍යාවේ රැස්වූ තීරක මණ්ඩලය විසින් මෙම නිල ප්‍රකාශය නිකුත් කරනු ලැබීය.

දිවයින පුරා පත් කරන ලද හිලාල් (සඳ බැලීමේ) උප කමිටුවල වාර්තාවලට අනුව, නව අඩ සඳ අද දර්ශනය වී ඇති බව තහවුරු වී තිබේ. ඒ අනුව, සමස්ත ලංකා ජම්ඉයියතුල් උලමා සභාවේ (ACJU) හිලාල් අංශය, කොළඹ මහ පල්ලිය සහ මුස්ලිම් ආගමික හා සංස්කෘතික කටයුතු දෙපාර්තමේන්තුව ඒකමතිකව තීරණය කළේ රාමසාන් මාසයේ පළමු දිනය හෙට බවයි.

ඉස්ලාමීය චන්ද්‍ර දින දර්ශනයේ 9 වන මාසය ලෙස සැලකෙන රාමසාන් මාසයේ උපවාසයේ යෙදීම ඉස්ලාම් දහමේ පංච මහා වගකීම්වලින් (කුළුණු පහෙන්) එකක් ලෙස සැලකේ. ලොව පුරා ඉස්ලාම් බැතිමතුන් මෙම මාසය පුරා අලුයම සිට සන්ධ්‍යාව දක්වා ආහාර පානවලින් වැළකී ආගමික වතාවත්වල නිරත වෙමින් අධ්‍යාත්මික පාරිශුද්ධත්වය අපේක්ෂා කරති.