හිඟුරක්ගොඩ බිහිසුණු අනතුරක් 

හිඟුරක්ගොඩ – පොළොන්නරුව ප්‍රධාන මාර්ගයේ හතමුණ ප්‍රදේශයේදී අද (23) උදෑසන සිදුවූ දරුණු රිය අනතුරකින් කාන්තාවන් දෙදෙනෙකු බරපතළ තුවාල ලබා තිබේ. අනතුර සිදුකළ මෝටර් රථය එම ස්ථානයෙන් පලාගොස් ඇති බව පොලීසිය පවසයි

මැදිරිගිරිය ප්‍රදේශයේ පදිංචි 45 සහ 50 යන වයස්වල පසුවන කාන්තාවන් දෙදෙනෙකු යතුරුපැදියකින් පොළොන්නරුව මහ රෝහලේ සිටි රෝගියෙකු බැලීම සඳහා යමින් සිටියදී මෙම අනතුරට මුහුණ දී ඇත. පොළොන්නරුව දෙස සිට හිඟුරක්ගොඩ දෙසට වේගයෙන් ධාවනය වූ මෝටර් රථයක් මොවුන් ගමන් ගත් යතුරුපැදියේ ගැටී ඇති බව මූලික විමර්ශනවලදී හෙළි විය.

අනතුරින් බරපතළ තුවාල ලැබූ කාන්තාවන් දෙදෙනා ප්‍රදේශවාසීන්ගේ මැදිහත්වීමෙන් වහාම පොළොන්නරුව මහ රෝහලට ඇතුළත් කර තිබේ. ඔවුන්ගේ තත්ත්වය බරපතළ බව රෝහල් ආරංචි මාර්ග තහවුරු කරයි.

අනතුර සිදුකර පලාගිය මෝටර් රථය හඳුනා ගැනීම සඳහා හිඟුරක්ගොඩ පොලීසිය විමර්ශන ආරම්භ කර ඇත. මාර්ගයේ සවිකර ඇති සීසීටීවී (CCTV) දර්ශන පරීක්ෂා කරමින් සැකකාර රථය සහ එහි රියදුරු අත්අඩංගුවට ගැනීමට පොලිස් කණ්ඩායම් කිහිපයක් යොදවා තිබේ.