මැද පෙරදිග ගැටුම් මැද බලශක්ති අර්බුදයට මුහුණ දෙන්න තායිලන්තය තීරණ රැසක් ගනී

මැදපෙරදිග පවතින ගැටුම්කාරී වාතාවරණය හේතුවෙන් හටගෙන ඇති බලශක්ති හිඟයට පිළියමක් ලෙස තායිලන්ත රජය එරට රාජ්‍ය නිලධාරීන්ට දැඩි සීමා පැනවීමට පියවර ගෙන තිබේ.

අග්‍රාමාත්‍ය අනූටින් චාන්විරාකුල් (Anutin Charnvirakul) විසින් හඳුන්වා දී ඇති මෙම ක්‍රියාමාර්ග යටතේ විදේශ සංචාර අත්හිටුවීම, විදුලි සෝපාන වෙනුවට පඩිපෙළ භාවිත කිරීම සහ නිවසේ සිට රාජකාරි කිරීම (Work from Home) වැනි පියවර ඇතුළත් වේ.

අද (10) සිට ක්‍රියාත්මක වන පරිදි අත්‍යවශ්‍ය සේවා හැර සෙසු රාජ්‍ය නිලධාරීන්ට නිවසේ සිට වැඩ කරන ලෙස උපදෙස් දී ඇති බව විදෙස් මාධ්‍ය වාර්තා කරයි. තායිලන්ත බලශක්ති අමාත්‍යවරයාට අනුව එරට සතුව මේ වන විට පවතින්නේ දින 95කට පමණක් සෑහෙන බලශක්ති සංචිතයකි.

තායිලන්තයේ බලශක්ති අවශ්‍යතාවයෙන් 68%ක්ම ස්වභාවික වායුවලින් සපුරා ගන්නා අතර, මියන්මාරයෙන් ලැබෙන සැපයුම්වලට පවතින බාධා හේතුවෙන් අමෙරිකාව, ඔස්ට්‍රේලියාව සහ දකුණු අප්‍රිකාව වැනි රටවලින් LNG වායුව ලබා ගැනීමට රජය උත්සාහ කරමින් සිටී.

තත්ත්වය තවදුරටත් උග්‍ර වුවහොත්, රාත්‍රී 10 වන විට පිරවුම්හල් වසා දැමීම සහ වෙළෙඳසැල්වල ආලෝක පුවරු සීමා කිරීම වැනි අනිවාර්ය නීති පැනවීමට ද රජය සලකා බලමින් සිටී. මේ අතර, ඉන්ධන පිරිමසා ගැනීම සඳහා පොදු ප්‍රවාහනය සහ රථවාහන හවුලේ භාවිත කරන ලෙස (Carpooling) රජය මහජනතාවගෙන් විශේෂ ඉල්ලීමක් ද සිදු කර තිබේ.