බොරතෙල් මිල වේගයෙන් පහතට

පසුගිය දින කිහිපය පුරා ලෝක වෙළඳපොළේ සීඝ්‍රයෙන් ඉහළ ගිය බොරතෙල් මිල මේ වන විට සැලකිය යුතු මට්ටමකින් පහළ බැස ඇති බව විදෙස් මාධ්‍ය වාර්තා කරයි.

මැදපෙරදිග කලාපයේ පවතින යුද උණුසුම හමුවේ 2022 වසරේ ජූලි මාසයෙන් පසු ප්‍රථම වතාවට බොරතෙල් බැරලයක මිල පසුගිය සඳුදා ඇමෙරිකානු ඩොලර් 100 සීමාව ඉක්මවා ගියේය. එහිදී බොරතෙල් බැරලයක් ඩොලර් 119ක් වැනි උපරිම මිලක් සටහන් විය.

කෙසේ වෙතත්, ඇමෙරිකානු ජනාධිපති ඩොනල්ඩ් ට්‍රම්ප් ඊයේ ප්‍රකාශ කළේ මැදපෙරදිග “යුද්ධය ඉතා ඉක්මනින් අවසන් වනු ඇති” බවයි. එම ප්‍රකාශයත් සමඟ වෙළඳපොළේ පැවති නොසන්සුන්කාරී බව පහව ගිය අතර, බ්‍රෙන්ට් (Brent) වර්ගයේ බොරතෙල් බැරලයක මිල 8% කින් එනම් ඩොලර් 90 දක්වා පහළ ගොස් තිබේ.

ආසියානු වෙළඳපොළේ අද උදෑසන ගනුදෙනු ආරම්භ වන විට මිල ගණන් ස්ථාවර මට්ටමක පවතින අතර නවතම මිල වාර්තා මෙසේය:

• ඇමෙරිකානු බොරතෙල් (WTI): බැරලයක් ඩොලර් 83.35
• බ්‍රෙන්ට් බොරතෙල් (Brent): බැරලයක් ඩොලර් 87.88

ඉරාන යුද්ධයේ වර්ධනයන් හමුවේ පසුගිය දින කිහිපය පුරා පැවති දැඩි අස්ථාවරත්වය මෙලෙස පහව යමින් පවතින බව ආර්ථික විශ්ලේෂකයෝ පවසති.