තිදෙනෙකුට දිවි අහිමි කළ මහරගම ගින්න ගැන තොරතුරු රැසක් එළියට! හිමිකරුම ගිනි තබා ඇති බවට හෙළිවෙයි!

මහරගම පමුණුව පාරේ දෙමහල් නිවසක ඉහළ මහලේ ඊයේ (18) පස්වරුවේ ඇතිවූ ගින්න, නිවසේ හිමිකරු විසින්ම සිදුකළ එකක් බව දැන්ට සිදුකළ විමර්ශන අනුව අනාවරණය වී ඇති බව පොලීසිය පවසයි.

මහරගම පමුණුව පාරේ, එක්සත් සුබසාධක මාවතේ දෙවන පටුමඟ අංක 17/2 දරන දෙමහල් නිවසේ ඉහළ මහලේ ඊයේ (18) පස්වරුවේ මෙම ගින්න හටගෙන තිබුණි.

පසුව එය දුටු ප්‍රදේශවාසීන් දැඩි පරිශ්‍රමයක් දරා ගින්න නිවාදැමීට කටයුතු කළේය.

එහිදී නිවස අභ්‍යන්තරයේ සිටි බරපතළ පිළිස්සුම් තුවාල ලැබූ පිරිමි පුද්ගලයන් දෙදෙනෙක් රෝහල්ගත කිරීමට පළමුව ඔවුන් කටයුතු කර ඇත.

එලෙස රෝහල්ගත කර ඇත්තේ නිවසේ හිමිකරු සහ කුලී පදනමට නිවසේ පදිංචිව සිටි පවුලේ ගෘහ මූලිකයාය.

කෙසේ වෙතත් අනතුරුව සිදුකළ සෝදිසියේදී නිවසේ කාමරයක් තුළ මියගොස් සිටීයදි එම ගෘහ මූලිකයාගේ බිරිඳගේ සහ දියණියගේ සිරුරු සොයාගෙන තිබුණි.

මෙලෙස මියගොස් ඇත්තේ රන්තකාන්ති වික්‍රමආරච්චි නම් 55 හැවිරිදි කාන්තාවක් සහ ඇගේ 16 හැවිරිදි දැරියකි.

එසේම රෝහල්ගත කර සිට 76 හැවිරිදි නිවසේ හිමිකරුද අද (19) පෙරවරුවේ මිය ගොස් ඇතැයි මහරගම පොලිසිය සඳහන් කළේය.

‍සිදුවීම සම්බන්ධයෙන් මහරගම පොලීසිය වැඩිදුර විමර්ශන සිදුකරයි.