විපක්ෂයේ දක්ෂයන්ට අවස්ථාව දෙනවා – ටිල්වින් සිල්වා

රාජ්‍ය ආයතනවල තනතුරු සඳහා පුද්ගලයන් පත් කිරීමේදී ඔවුන්ගේ දේශපාලන පක්ෂය නොව, ඔවුන් සතු හැකියාව සහ දක්ෂතාවය පමණක් සලකා බලන නව දේශපාලන සංස්කෘතියක් රට තුළ ස්ථාපිත කරන බව ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා පවසයි.

රූපවාහිනී වැඩසටහනකට සහභාගී වෙමින් ලේකම්වරයා අවධාරණය කළේ, රජයේ ආයතනවල තනතුරු තම පක්ෂයේ හිතවතුන්ගෙන් පුරවා ගැනීමේ පැරණි සංස්කෘතිය වත්මන් රජය සම්පූර්ණයෙන්ම ප්‍රතික්ෂේප කරන බවයි.

“අපි බලයට ආවේ රාජ්‍ය ආයතනවල තනතුරු ඔක්කොටම අපේ පක්ෂයේ කට්ටිය දාගන්න නෙවෙයි. අපිට ඕන කරන්නේ ඒ තැන්වලට හැකියාව තියෙන අය දාගන්න. එතකොට අපි එයාගේ දේශපාලන පක්ෂය මොකක්ද කියලා හොයන්න යන්නේ නැහැ,” යැයි ඔහු සඳහන් කළේය.

වර්තමාන රජය යටතේ ක්‍රිකට් කමිටුව වැනි ආයතන සඳහා දක්ෂ පුද්ගලයන් පත් කර ඇති ආකාරය මෙහිදී නිදසුන් ලෙස පෙන්වා දුන් ඒ මහතා, ඕනෑම ක්ෂේත්‍රයක සිටින දක්ෂතම පුද්ගලයාගේ සහාය ලබා ගැනීම රජයේ මූලික ප්‍රතිපත්තිය බව කියා සිටියේය.

රජයක් ලෙස සියලු දේ තමන් පමණක් දන්නා බව සිතීම මුලාවක් බවත්, ඒ ඒ විෂය පථයන්හි නිපුණතාවයක් ඇති අයගේ දායකත්වය රට ගොඩනැගීමේ කාර්යයට අත්‍යවශ්‍ය බවත් ටිල්වින් සිල්වා මහතා වැඩිදුරටත් පැවසීය.