ව්‍යවසායකයන්ට ඇප රහිතව ණය ලබාගැනීමට නව අවස්ථාවක්

ඉඩම් හෝ ස්ථාවර වත්කම් ඇපයට තැබීමට නොහැකි වීම නිසා මූල්‍ය පහසුකම් ලබා ගැනීමට අපොහොසත් වන කුඩා හා මධ්‍ය පරිමාණ ව්‍යවසායකයන් සඳහා විශේෂ ඇප රහිත ණය ක්‍රමයක් හඳුන්වා දී ඇති බව කර්මාන්ත හා ව්‍යවසායකත්ව සංවර්ධන නියෝජ්‍ය අමාත්‍ය චතුරංග අබේසිංහ මහතා ප්‍රකාශ කළේය.

මෙම ක්‍රමය යටතේ ණය ලබා දෙන්නේ ව්‍යාපාරයේ ස්ථාවර වත්කම් මත නොව, එහි ශක්‍යතාව (Feasibility) සහ මුදල් ප්‍රවාහයේ (Cash Flow) ශක්තිය මත පදනම්වය. මෙහිදී බැංකුවලට පවතින අවදානම අවම කිරීම සඳහා රජය මැදිහත් වේ:

• සාමාන්‍ය ව්‍යාපාර: රජය 70%ක ආරක්ෂාවක් (ඇපයක්) සපයන අතර, ඉතිරි 30% බැංකු විසින් දරනු ලබයි.
• කාන්තා ව්‍යවසායකයන්: රජයේ දායකත්වය 80% දක්වා ඉහළ නංවා ඇත.

රුපියල් ලක්ෂ 5 සිට රුපියල් මිලියන 25 දක්වා මූල්‍ය පහසුකම් මෙමඟින් ලබාගත හැකිය. දැනටමත් ව්‍යාපාර 1,747ක් මෙම වැඩසටහනෙන් ප්‍රතිලාභ ලබා ඇති බව නියෝජ්‍ය අමාත්‍යවරයා පැවසීය. වැදගත්ම කරුණ වන්නේ මෙම ණය ලබා ගැනීමට අමාත්‍යවරුන්ගේ නිර්දේශ හෝ දේශපාලන අනුමැතිය අවශ්‍ය නොවීමයි. ව්‍යවසායකයන්ට අදාළ බැංකු හරහා සෘජුවම අයදුම් කළ හැකිය.

යම් හෙයකින් බැංකුවක් අසාධාරණ ලෙස ණය ඉල්ලීමක් ප්‍රතික්ෂේප කළහොත්, ඒ පිළිබඳව ජාතික ණය ඇපකර ආයතනය (NCGI) වෙත සෘජුවම පැමිණිලි කර සහාය ලබා ගැනීමට ව්‍යවසායකයන්ට අවස්ථාව සලසා දී ඇත.