ලෝක සෞඛ්‍ය සංවිධානයෙන් ශ්‍රී ලංකාවට විශේෂ ඇගයීමක්

ශ්‍රී ලංකාව මැලේරියාවෙන් තොර රටක් ලෙස එය නැවත ව්‍යාප්ත වීම වළක්වා ගනිමින් එම තත්ත්වය වසර 10ක් පුරා අඛණ්ඩව පවත්වාගෙන යාම වෙනුවෙන් ලෝක සෞඛ්‍ය සංවිධානය (WHO) විසින් ශ්‍රී ලංකාවට විශේෂ ඇගයීමක් සිදු කර තිබේ.

ටිමෝර්-ලෙස්තේ හි ඩිලි නුවර පැවැත්වෙන ලෝක සෞඛ්‍ය සංවිධානයේ දකුණු-නැගෙනහිර ආසියානු කලාපීය කමිටුවේ 79 වන සැසියේදී මෙම ඇගයීම් සහතිකය සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා වෙත ඊයේ (08) පිරිනමන ලදී.

ලෝක සෞඛ්‍ය සංවිධානයේ අධ්‍යක්ෂ ජනරාල් වෛද්‍ය ටෙඩ්‍රොස් අධානොම් ගෙබ්‍රියේසස් මහතාගේ අත්සනින් යුතු මෙම සහතිකය මගින් ශ්‍රී ලංකාවේ ප්‍රත්‍යස්ථ ප්‍රාථමික සෞඛ්‍ය සේවා පද්ධතිය සහ කාර්යක්ෂම රෝග පාලන වැඩසටහන් අගය කර ඇත.

මීට අමතරව, මව්වරුන් සහ අලුත උපන් බිළිඳුන්ගේ පිටගැස්ම (Maternal and Neonatal Tetanus) තුරන් කළ තත්ත්වය ද වසර 10ක් පුරා අඛණ්ඩව පවත්වාගෙන යාම මෙහිදී WHO හි විශේෂ ඇගයීමට ලක්විය.