‘විනිසුරු ලවා දඬුවම අඩු කරලා දෙන්නම්’: සරණ ගුණවර්ධනගේ බිරිඳගෙන් අල්ලස් ගත් බව කියන අධිකරණ සහයකයෙකු රිමාන්ඩ්

හිටපු නියෝජ්‍ය අමාත්‍ය සරණ ගුණවර්ධන මහතාට එරෙහිව පවතින අල්ලස් නඩුවකදී විනිසුරුවරයාගෙන් අඩු දඬුවමක් ලබා දෙන බව පවසා ඔහුගේ බිරිඳගෙන් රුපියල් 750,000ක අල්ලස් මුදලක් ලබාගත් බව කියන කොළඹ මහාධිකරණ විනිසුරුවරයකුගේ සහයකයෙකු (ආරච්චි) ලබන 22 වනදා දක්වා රක්ෂිත බන්ධනාගාරගත කිරීමට කොළඹ ප්‍රධාන මහේස්ත්‍රාත් අසංග එස්. බෝදරගම මහතා ඊයේ (08) නියෝග කළේය.

සැකකාර සහායකයා මහාධිකරණ විනිසුරුවරයාට දුරකථන ඇමතුමක් ලබාදී නඩුවක් සම්බන්ධයෙන් කතා කරගැනීමට උසාවියෙන් පිටතදී හමුවීමට ඉල්ලා සිටීම නිසා විනිසුරුවරයා විසින්ම අල්ලස් කොමිසමට කළ පැමිණිල්ලකට අනුව මෙම විමර්ශනය ආරම්භ කර ඇත.

සැකකරුගේ ජංගම දුරකථනය පරීක්ෂා කිරීමේදී සරණ ගුණවර්ධනගේ බිරිඳ සමග පවත්වා ඇති WhatsApp සංවාද සහ වරින් වර රු. 750,000ක මුදලක් ගිණුම්ගත කරගෙන ඇති බවට තොරතුරු අනාවරණය වී තිබේ.

සිද්ධියට සම්බන්ධ බව කියන අත්තනගල්ල අධිකරණයේ නිලධාරියෙකු සහ ඉහත මුදලින් රුපියල් 500,000ක් ලබාගත් බව කියන කොළඹ මහාධිකරණයේ පොත් බැඳුම්කරුවෙකු සම්බන්ධයෙන් ද වැඩිදුර විමර්ශන ක්‍රියාත්මක බව අල්ලස් කොමිසම අධිකරණයට දැනුම් දුන්නේය.