හිටපු ජනපති මහින්දට පඩි නගින්න බැරි නිසා ජනතා මුදලින් ලක්ෂ 143ක් වැය කරලා

2021 කාල සීමාවේදී විජේරාම නිල නිවසට එක් කෝටි හතලිස් තුන් ලක්ෂයක් වියදම් කර  විදුලි පඩිපෙළක්  සවි කිරීමට කටයුතු කළේ හිටපු ජනාධිපති මහින්ද රාජපක්ෂ මහතාට පඩි නැගීමේ අපහසුතාවක් තිබුණු නිසා බව ශ්‍රී ලංකා පොදුජන පෙරමුණේ මහ ලේකම්  සාගර කාරියවසම් මහතා පවසනවා.

ඊයේ (29) පැවති රූපවාහිනි වැඩසටහනට එක්වෙමින් ඔහු මේ බව සඳහන් කළා.

2021 සිට 2023 දක්වා වසර තුනක් ඇතුළත හිටපු ජනාධිපති මහින්ද රාජපක්ෂ මහතාගේ විජේරාම නිල නිවස අලුත්වැඩියා කිරීම සඳහා  රජයේ බදු මුදල්වලින් කෝටි 51ක පමණ මුදලක් වියදම් කිරීම, රාජපක්ෂ පාලන සමයේ තිබූ නාස්තිකාර දේශපාලන සංස්කෘතිය පැහැදිලිව පෙන්වන අවස්ථාවක් නොවේද යනුවෙන් පූර්වකයා සාගර කාරියවසම් මහතාගෙන් විමසා සිටියා.

ඊට පිළිතුරු ලබාදෙමින් ඔහු කියා සිටියේ, මෙම අලුත්වැඩියා කටයුතු සිදු කර ඇත්තේ ඇස්තමේන්තු කර, රජයේ ක්‍රියාවලියක් තුළ ටෙන්ඩර් කැඳවාගෙන නිලධාරීන් විසින් මිස, මහින්ද රාජපක්ෂ මහතාගේ සෘජු තීරණය මත නොවන බවයි.

කෙසේවෙතත් විජේරාම නිල නිවස රුපියල් කෝටි 51 ක් පමණ වියදම් කර අලුත්වැඩියා කළ බවට පෙන්වාදුන් සාගර කාරියවසම් මහතා,  එම මුදල් මහින්ද රාජපක්ෂ මහතා  ‘ගෙදර අරන් ගියේ නැහැ’ යනුවෙන් එහිදී  අවධාරණය කළා.

එම  අලුත්වැඩියා කළ විජේරාම නිල නිවස අදවන විට  රජය සතු වී ඇති  බව සාගර කාරියවසම් මහතා පෙන්වාදෙනවා.