IPL විකාශන අයිතිය ඉන්දීය රුපියල් කෝටි 44,075 කට අලෙවි වෙයි

ඉන්දීය ප්‍රිමියර් ලීග් (අයි.පී.එල්) ක්‍රිකට් තරගාවලියේ 2023 වසරේ සිට 2027 වසර දක්වා කාලය සදහා ඉන්දීය උප මහද්වීපික කලාපයේ රූපවාහිනී විකාශන අයිතිය හා ඩිජිටල් විකාශන අයිතිය විකාශන ආයතන දෙකක් විසින් හිමි කර ගෙන ඇති බව ඉන්දීය මාධ්‍ය වාර්තා කරනවා.

කෙසේ වෙතත්, විකාශන අයිතිය හිමි කර ගත් ආයතන පිළිබදව හා මිල ගණන් සම්බන්ධයෙන් මෙතෙක් ඉන්දීය ක්‍රිකට් පාලක මණ්ඩලය විසින් නිල වශයෙන් නිවේදනය කර නැහැ.

ඉන්දීය මාධ්‍ය වාර්තාවලට අනුව රූපවාහිනී හා ඩිජිටල් විකාශන අයිතිය වෙනුවෙන් ලැබී ඇති ඉහළම ලංසු දෙකේ එකතුව අනුව ඉදිරි වසර 5 සදහා අයි.පී.එල් තරගාවලියේ විකාශන වටිනාකම සටහන් වන්නේ ඉන්දීය රුපියල් කෝටි 44,075 ක් ලෙසයි.

රූපවාහිනී විකාශන අයිතිය වෙනුවෙන් වූ අවම මූලික ලංසු මුදල (එක් තරගයක් සදහා) ඉන්දීය රුපියල් කෝටි 49ක් ලෙසයි ඉදිරිපත් කර තිබුණේ.

ඩිජිටල් විකාශන අයිතිය සදහා ඉන්දීය රුපියල් කෝටි 33ක මූලික ලංසු වටිනාකමක් ප්‍රකාශයට පත් කර තිබුණා.

නමුත්, වෙන්දේසියේ දී රූපවාහිනී විකාශන අයිතිය එක් තරගයක් සදහා ඉන්දීය රුපියල් කෝටි 57.5ක ලංසුවක් යටතේ ද, ඩිජිටල් විකාශන අයිතිය එක් තරගයක් සදහා ඉන්දීය රුපියල් කෝටි 50ක ලංසුවක් යටතේ ද පිරිනමා ඇති බවයි ඉන්දීය මාධ්‍ය වාර්තා කර ඇත්තේ.

ඒ අනුව එක් තරගයක සමස්ත විකාශන වටිනාකම සටහන් වන්නේ ඉන්දීය රුපියල් කෝටි 107.5 ක් ලෙසයි.

වසර 5ක කාලය සදහා තරග 410ක් වෙනුවෙන් මෙම විකාශන අයිතිය පිරිනමා ඇති බව සදහන්.

2018-22 අතර කාලයට අදාළ විකාශන අයිතිය පිරිනමා තිබුණේ එක් තරගයකට ඉන්දීය රුපියල් කෝටි 54.23ක ලංසු මුදලකටයි.

රූපවාහිනී විකාශන අයිතිය ලබා ගැනීම සදහා එම අයිතිය හිමි කර ගත් ආයතනය ඉදිරි වසර 5ක කාලය වෙනුවෙන් දරනු ලබන සමස්ත මුදල ඉන්දීය රුපියල් කෝටි 23,575 ක් වනවා.

ඩිජිටල් විකාශන අයිතිය ලබා ගැනීම සදහා ඉදිරි වසර 5ක කාලය වෙනුවෙන් එම අයිතිය හිමි කර ගත් ආයතනය දරනු ලබන සමස්ත මුදල ඉන්දීය රුපියල් කෝටි 20,500ක් වනවා.

අයි.පී.එල් ක්‍රිකට් තරගාවලියේ 2023 වසරේ සිට 2027 වසර දක්වා කාලය සදහා විකාශන අයිතිය පිරිනැමීම වෙනුවෙන් වූ වෙන්දේසිය ඊයේ දිනයේ දී යි ආරම්භ වුණේ.

රූපවාහිනී විකාශන අයිතිය Disney Star සමාගම විසින් ද, ඩිජිටල් විකාශන අයිතිය Viacom18 සමාගම විසින් ද හිමි කර ගෙන ඇති බවටයි මාධ්‍ය වාර්තා පලව ඇත්තේ.