පොලිස් සිර මැදිරියේ සිටි තරුණයෙකු මියයෑම ගැන ඥාතීන්ගෙන් පොලිසියට චෝදනා

හෝමාගම මූලස්ථාන පොලිසියේ අත්අඩංගුවේ සිටි තරුණයෙකුට පහරදී ඝාතනය කර ඇති බවට ඔහුගේ ඥාතීන් චෝදනා කරනවා.

අද (25) අලුයම් කාලයේදී පොලිසිය විසින් අත්අඩංගුවට ගෙන සිර මැදිරියේ රඳවා සිටි මෙම තරුණයා මියගොස් ඇත්තේ පොලිස් නිලධාරීන්ගේ පහරදීම හේතුවෙන් බවයි ඥාතීන් පවසන්නේ.

මෙලෙස මියගොස් ඇත්තේ කිරිවත්තුඩුව, මුනමලේවත්ත ප්‍රදේශයේ පදිංචිව සිටි 29 හැවිරිදි එක්දරු පියෙකු වන ෆැන්සිස් දුරගේ ඉෂාර හර්ෂ කුමාර නමැත්තායි.

අද උදෑසන ඔහු බැලීම සඳහා ඥාතීන් හෝමාගම මූලස්ථාන පොලිසියට ගොස් තිබෙන අතර, එහිදී අපරාධ විමර්ශන අංශයට රැගෙන ගොස් සිටි තරුණයා පොලිස් නිලධාරීන් සිව්දෙනෙකු විසින් ඔසවාගෙන පැමිණි බවත්, ඔහුට පහරදී තිබූ බවත් ඥාතීන් චෝදනා කරනවා.

පසුව පොලිස් සිර මැදිරියේ වැතිර සිටි තරුණයා ඥාතීන්ගේ ඉල්ලීම මත හෝමාගම මූලික රෝහලට ඇතුළත් කිරීමට පොලිසිය කටයුතු කර තිබෙන අතර, කෙසේ වෙතත්, ඒ වන විටත් ඔහු මියගොස් සිටි බවයි ඥාතීන් පවසන්නේ.

තම ඥාතියාගේ මරණය සම්බන්ධයෙන් සාධාරණය ඉටු කරන ලෙස ඉල්ලා සිටින ඔවුන්, හෝමාගම මූලික රෝහල් භූමියේදී කලබලකාරී ලෙස හැසිරීමෙන් රෝහල් භූමියේ දැඩි උණුසුම් තත්ත්වයක් හට ගෙන තිබෙන බවත් වාර්තා වෙනවා.

(source – hiru news)