රඹුක්කන සහ පේරාදෙණිය – ගම්පොළ අතර දුම්රිය ධාවනය තාවකාලිකව අත්හිටුවයි

පවතින අයහපත් කාලගුණික තත්ත්වය හේතුවෙන් අද (25) මධ්‍යම රාත්‍රී 12 සිට නැවත දැනුම්දෙනතුරු රඹුක්කන සහ පේරාදෙණිය – ගම්පොළ අතර සියලුම දුම්රිය ධාවනය තාවකාලිකව අත්හිටුවීමට දුම්රිය දෙපාර්තමේන්තුව තීරණය කර තිබෙනවා.

රඹුක්කන සහ පේරාදෙණිය දුම්රිය ස්ථාන අතර කඩිගමුව දුම්රිය ස්ථානය ආසන්නයේ නායයෑමක් සක්‍රිය වීමත් සමඟ දුම්රිය මාර්ගයට පස් සේදී ඒම හේතුවෙන් මෙම පියවර ගෙන ඇති බවයි එම දෙපාර්තමේන්තුව සඳහන් කළේ.

දුම්රිය මාර්ගය යථා තත්ත්වයට පත් කිරීම සඳහා ඊයේ (24) සහ අද (25) හදිසි ප්‍රතිසංස්කරණ කටයුතු සිදුකර තිබුණ ද, ප්‍රදේශයට තවදුරටත් ඇදහැලෙන අධික වර්ෂාව හේතුවෙන් පස් කඳු කඩා වැටීමේ අවදානම පහව ගොස් නොමැති බව දුම්රිය දෙපාර්තමේන්තුව පවසනවා.

ඒ අනුව, ප්‍රතිසංස්කරණ කටයුතු අවසන් කර දුම්රිය ධාවනය සඳහා මාර්ගයේ ආරක්ෂාව පූර්ණ වශයෙන් තහවුරු කරන තෙක් අදාළ දුම්රිය ධාවන කටයුතු අත්හිටුවීමටයි පියවර ගෙන ඇත්තේ.

මේ අතර, මෙම කාලසීමාව තුළ ධාවනය වීමට නියමිතව තිබූ දුම්රිය සඳහා මුදල් ගෙවා ආසන වෙන්කරවා ගත් මගීන්ට, එම මුදල සම්පූර්ණයෙන්ම ඕනෑම දුම්රිය ස්ථානයකින් නැවත ලබාගැනීමට පහසුකම් සලසා ඇති බව ද දුම්රිය දෙපාර්තමේන්තුව වැඩිදුරටත් දැනුම් දෙනවා.