තරුණියකගේ නිරුවත් දර්ශන අන්තර්ජාලයට මුදාහරින බවට බියගන්වා තර්ජනය කළ චීවරධාරී ගුරුවරයෙක් අත්අඩංගුවට

තරුණියකගේ නිරුවත් ඡායාරූප සහ වීඩියෝ දර්ශන අන්තර්ජාලයට මුදාහරින බවට පවසමින් ඇයට තර්ජනය කළ බව කියන සිවුරක් දරාගත් පුද්ගලයෙකු උඩුගම පොලිසිය මගින් අත්අඩංගුවට ගෙන තිබේ.

ගාල්ල දිසා බාර නියෝජ්‍ය පොලිස්පති කාර්යාලය සඳහන් කළේ මෙලෙස අත්අඩංගුවට ගෙන ඇත්තේ කණිෂ්ඨ විද්‍යාලයක ගුරුවරයෙකු ලෙස සේවය කරන 33 හැවිරිදි භික්ෂුවක් බවයි.

අදාළ තරුණිය සමඟ ප්‍රේම සබඳතාවක් පැවැති සමයේ දෙදෙනා අතර ජංගම දුරකථන හරහා නිරුවත් වීඩියෝ දර්ශන හුවමාරු වී ඇති බව පොලිස් පරීක්ෂණවලදී අනාවරණය වී ඇත.

කෙසේවෙතත්, මීට මාස තුනකට පමණ පෙර එම ප්‍රේම සබඳතාව නතර කර ඇති අතර, පසුව සැකකාර හිමිනම විසින් තරුණියගේ නිරුවත් දර්ශන සමාජ මාධ්‍ය වෙත මුදාහරින බවට තර්ජනය කර තිබේ.

සිද්ධිය සම්බන්ධයෙන් අදාළ තරුණිය විසින් පොලිසියට කරන ලද පැමිණිල්ලකට අනුව ක්‍රියාත්මක වූ උඩුගම පොලිසිය විසින් සැකකරු අත්අඩංගුවට ගෙන ඇත.