මහේල ජයවර්ධන මුම්බායි පිලට සමුදෙයි

ශ්‍රී ලංකා හිටපු ක්‍රිකට් නායක මහේල ජයවර්ධන, ඉන්දීය ප්‍රිමියර් ලීග් තරගාවලියේ මුම්බායි ඉන්ඩියන්ස් කණ්ඩායමේ ප්‍රධාන පුහුණුකරු ධුරයෙන් ඉවත් වී තිබෙනවා.

මුම්බායි ඉන්ඩියන්ස් කණ්ඩායම අද (17) මේ බව නිවේදනය කර ඇති බවයි වාර්තා වන්නේ.

මහේල ජයවර්ධන පසුගිය වසර දෙකක කාලය තුළ එම කණ්ඩායමේ ප්‍රධාන පුහුණුකරු ලෙස කටයුතු කළා.

මෙය ඔහු එම තනතුරෙන් ඉවත් වූ දෙවැනි අවස්ථාව වන අතර, මීට පෙර 2017 සිට 2022 දක්වා ද ඔහු එම ධුරය හෙබවූවා.

ඔහුගේ පළමු ධුර කාලය තුළ මුම්බායි ඉන්ඩියන්ස් කණ්ඩායම IPL ශූරතා තුනක් දිනා ගැනීමට සමත් වුණා.

කෙසේ වෙතත්, දෙවැනි ධුර කාලය තුළදී 2025 වසරේ තරගාවලියේ සිව්වැනි ස්ථානයට පත්වූ මුම්බායි කණ්ඩායම, 2026 වසරේදී නවවැනි ස්ථානයට පත්වීම විශේෂත්වයක්.

ධුරයෙන් ඉවත්වීම පිළිබඳව අදහස් දක්වමින් මහේල ජයවර්ධන සඳහන් කර ඇත්තේ, දශකයකට වැඩි කාලයක් මුම්බායි ඉන්ඩියන්ස් කණ්ඩායම තම ක්‍රිකට් දිවියේ සුවිශේෂී කොටසක් වූ බවයි.

එමෙන්ම, තමන්ට වසර ගණනාවක් පුරා විශ්වාසය සහ සහයෝගය ලබාදුන් නීතා අම්බානි සහ ආකාෂ් අම්බානිට ද ඔහු සිය ස්තූතිය පළ කර තිබෙනවා.

මේ අතර, නොවැම්බර් 15 වැනිදාට නියමිත IPL ක්‍රීඩක රඳවා ගැනීමේ අවසන් දිනයට පෙර මුම්බායි ඉන්ඩියන්ස් කණ්ඩායමට නව ප්‍රධාන පුහුණුකරුවෙකු පත් කර ගැනීමට සිදුවනු ඇති.