දිනකට තුන් දෙනෙකුට ජීවිත අහිමි කරන බුලත්විට මාරයා

බුලත්විට, පුවක් සහ හුණු භාවිතය නිසා ශ්‍රී ලංකාවේ දිනකට පුද්ගලයන් තුනක් මරණයට පත්වෙමින් පවතින බව දුම්කොළ හා මධ්‍යසාර පිළිබඳ ජාතික අධිකාරියේ සභාපති මහාචාර්ය හේමන්ත අමරසිංහ මහතා පවසයි.

ඊයේ (4) කොළඹ සෙත්සිරිපාය දී පැවැති දුම්කොළ හා මධ්‍යසාර පිළිබඳ වැඩමුළුවකට සහභාගී වෙමින් මහාචාර්ය අමරසිංහ සඳහන් කළේ, බුලත් සහ පුවක් කෑමෙන් මූඛ පිළිකා රෝගීන් නවදෙනෙක් (09) දිනකට වාර්තා වන බවයි.

දිගු කාලයක් තිස්සේ බුලත්, පුවක්, හුණු සහ දුම්කොළ භාවිතය මගින් මුඛ හා උගුර ආශ්‍රිත පිළිකා රෝග ඇතිවීමේ අවදානම වැඩි වන බවත්, එය විශේෂයෙන් තරුණ පිරිස අතරද වේගයෙන් පැතිරෙමින් පවතින බවත් ඔහු අවධාරණය කළා.

මධ්‍යසාර හා දුම්කොළ පිළිබඳ ජාතික අධිකාරිය අනාවරණය කර ඇත්තේ, මේ වසරේ දී පමණක් රටපුරා පිළිකා රෝගීන් හතළිස් දහසක් (40,000) වාර්තා වී ඇති බවය.

එම අධිකාරිය සිදුකළ අධ්‍යයන අනුව, බොහෝවිට පිළිකා ඇතිවීමට ප්‍රධාන හේතු ලෙස බුලත්විට කෑම, දුම්කොළ භාවිතය, මත්පැන් සහ අක්‍රමවත් ආහාර රටාවන් හඳුනාගෙන ඇත.

මහාචාර්ය අමරසිංහ වැඩිදුරටත් පෙන්වා දුන්නේ, වැඩිහිටි ජනගහනය වැඩිවීමත් සමඟ පිළිකා ඇතිවීමේ අවදානමද ඉහළ යමින් ඇති බවත්, බුලත්විට සහ දුම්කොළ භාවිතය අඩු කිරීම රටේ සෞඛ්‍ය තත්ත්වය උසස් කිරීමට අත්‍යවශ්‍ය පියවරක් බවත්ය.