තරු පහේ හෝටලයට එරෙහිව නඩු පැවරවීමට සැරසෙන බලංගොඩ කස්සප හිමි

විරෝධතාව අතරතුර තමන් වහන්සේ දැඩි ලෙස රෝගාතුරව සිටි බැවින් දායකයන් විසින් අදාළ නවාතැන් සහ වෛද්‍ය පහසුකම් සලසා දුන් බවත්, එතැනට පැමිණි වෛද්‍ය කණ්ඩායම් ප්‍රතිකාර ලබාදුන් බවත් පූජ්‍ය බලංගොඩ කස්සප හිමියෝ පවසති.

බෞද්ධ සම්ප්‍රදාය අනුව අතීතයේ සිටම දායකයන් විසින් භික්ෂූන් වහන්සේලාට දානය, නවාතැන්, වාහන සහ ඉඩකඩම් පවා පූජා කර ඇති පසුබිමක හෝටල් කාමරයක් ගැන මෙලෙස ආන්දෝලනයක් ඇති කිරීම ප්‍රශ්නසහගත බව උන්වහන්සේ සඳහන් කළහ.

භික්ෂූන් වහන්සේලාට උපකාර කළ දායකයන්ගේ සහ හෝටලයේ නවාතැන් ලබාදුන් අයගේ පෞද්ගලික හා අනන්‍යතා තොරතුරු හෝටල් කළමනාකාරීත්වය විසින් මාධ්‍ය වෙත ලබාදීම බරපතළ කරුණක් බවත්, ඊට එරෙහිව නීතිමය පියවර ගන්නා බවත් උන්වහන්සේ පැවසූහ.

විරෝධතාවයට සහාය දක්වන පිරිස් බියගැන්වීමේ අරමුණින් රජයේ ආධාරකරුවන් විසින් භික්ෂූන් වහන්සේලා භාවිත කළ වාහන ඡායාරූප ගත කර, හිමිකරුවන්ගේ තොරතුරු මාධ්‍ය වෙත මුදාහැර ඇති බවට ද උන්වහන්සේ වැඩිදුරටත් චෝදනා කළහ.