ඥානසාර හිමිට වහාම සමාව දෙන්න! UNPයෙන් නිවේදනයක්!

ගලගොඩඅත්තේ ඥානසාර හිමියන්ට වහාම ජනාධිපති සමාව ලබාදී අර්බුදය අවසන් කළ යුතු බව එක්සත් ජාතික පක්ෂය අවධාරණය කරනවා.

නිවේදනයක් නිකුත් කරමින් එම පක්ෂය සඳහන් කළේ, ත්‍රෛනිකායික මහා නාහිමිවරුන්ගේ දැනුම්දීම අනුව ඥානසාර හිමියන්ට නිදහස ඉල්ලා පැවැත්වූ සත්‍යග්‍රහය තාවකාලිකව අවසන් කිරීමට පියවර ගෙන ඇති බවයි.

හිටපු අගවිනිසුරු සරත් එන්. සිල්වාගේ නිගමනයට අනුව අධිකරණයට අපහාස කිරීමේ වරදට නියම කළ හැකි උපරිම සිරදඬුවම මාස 18ක් බවත්, එම වරද සම්බන්ධයෙන් ඥානසාර හිමියන් මාස 10කට අධික කාලයක් බන්ධනාගාරගතව සිට ඇති බවත් එම නිවේදනයේ සඳහන්.

මහානායක හිමිවරුන්ගේ ඉල්ලීම මත එදා ඥානසාර හිමියන්ට ජනාධිපති සමාව ලබාදීමට පියවර ගත් බවත්, ශ්‍රේෂ්ඨාධිකරණ තීන්දුවේ ද උන්වහන්සේට යළි ජනාධිපති සමාවක් ලබාදීම සලකා බැලිය හැකි බව සඳහන් වන බවත් එම නිවේදනයේ දැක්වෙනවා.

ඥානසාර හිමියන්ගේ නිදහස වෙනුවෙන් පැවති පාගමනට සහ සත්‍යග්‍රහයට සහභාගි නොවූ භික්ෂූන් වහන්සේලාට එරෙහිව ද අධිකරණ නියෝග ලබාගැනීමට රජය කටයුතු කිරීම බරපතල වැරැද්දක් බවයි එජාපය පවසන්නේ.

එමෙන්ම, ඥානසාර හිමියන්ගේ සිවුර ඉවත් කිරීමට නියෝග දුන් පුද්ගලයන් සම්බන්ධයෙන් ද පරීක්ෂණයක් පැවැත්වීම සුදුසු බව එම පක්ෂය නිවේදනයේ සඳහන් කරනවා.

ත්‍රෛනිකායික මහා නාහිමිවරුන්ගේ මැදිහත්වීම යටතේ ඥානසාර හිමියන්ට වහාම ජනාධිපති සමාව ලබාදී මෙම අර්බුදය අවසන් කළ යුතු බව එක්සත් ජාතික පක්ෂය වැඩිදුරටත් අවධාරණය කර තිබෙනවා.