පාසල් සංවර්ධන නිළධාරීන් විරෝධතාවයක – “අපිට ගුරු පත්වීම් දීලා වෙන ඕනි කෙනෙකුට දෙන්න”

ජාතික පාසල් සහ පළාත් සභා පාසල්වලට උපාධිධාරීන් බඳවා ගැනීම සඳහා පැවැත්වීමට තිබූ තරග විභාගය අත්හිටුවන ලෙස ශ්‍රේෂ්ඨාධිකරණයට ඉදිරිපත් වූ පෙත්සම් නිෂ්ප්‍රභ වීම හමුවේ තරග විභාගය පැවැත්වීමට ඉදිරියේදී හැකිවන බව ජාතික ජන බලවේගයේ පාර්ලිමේන්තු මන්ත්‍රී චන්දන සූරියආරච්චි ප්‍රකාශ කළා.

ඒ සම්බන්ධයෙන් අභියාචනාධිකරණයේ විභාග වෙමින් පවතින පෙත්සමට අදාළව තීරණය ලැබීමෙන් අනතුරුව කඩිනමින් තරග විභාගය පැවැත්වීමට අදාළ කටයුතු සූදානම් කරන බවයි මන්ත්‍රීවරයා සඳහන් කළේ.

ඔහු කියා සිටියේ රැකියා විරහිත උපාධිධාරීන්ට ද මේ සඳහා ඉල්ලීම් කිරීමේ හැකියාව පවතින බවයි.

එවන් පසුබිමක තමන්ව වහාම ගුරු සේවයට බඳවා ගන්නා ලෙසට බලකරමින් සමස්ත ලංකා පාසැල් සංවර්ධන නිලධාරීන්ගේ සංගමය ඊයේ දහවල් ජනාධිපති ලේකම් කාර්යාලය ඉදිරිපිට විරෝධතාවයක නිරත වුණා.

අනතුරුව සමස්ත ලංකා පාසැල් සංවර්ධන නිලධාරීන්ගේ සංගමයේ සාමාජිකයින් 10 දෙනෙකුට ජනාධිපති මහජන සබඳතා අධ්‍යක්ෂ ජනරාල්වරයා සමග සාකච්ඡාවකට අවස්ථාව හිමි වුණා.