ඉන්දීය ප්‍රබල ක්‍රීඩකයෙක්ට ශ්‍රී ලංකා තරඟාවලිය අහිමි වෙයි

ශ්‍රී ලංකාව සහ ඉන්දියාව අතර පැවැත්වීමට නියමිත තරග දෙකකින් සමන්විත ප්‍රබල ටෙස්ට් තරගාවලිය ආරම්භ වීමට මෙපිටින් ඉන්දීය කඳවුරෙන් ඉතාමත් අනපේක්ෂිත ආරංචියක් වාර්තා වෙනවා. ඉන්දීය කණ්ඩායමේ ඉදිරිපෙළ ප්‍රබල පිතිකරු සායි සුදර්ශන්ට මෙම සමස්ත ටෙස්ට් තරගාවලියම අහිමි වී යාමේ දැඩි අවදානමකට මුහුණ දීමට සිදුව තිබෙනවා.

විදෙස් මාධ්‍ය වාර්තා කරන ආකාරයට ඔහුගේ පාදයේ ඇඟිල්ලක ඇති වූ හදිසි ආබාධ තත්ත්වයක් මෙයට ප්‍රධානතම හේතුව වී තිබෙනවා. මෙම හදිසි තත්ත්වයත් සමඟ තරගාවලියට මුහුණ දීමට සිටි ඉන්දීය පිතිකරණ බලඇණියට විශාල පහරක් එල්ල වී ඇති බවයි වාර්තා වන්නේ.

මීට දින කිහිපයකට පෙර ද ඉන්දීය වේගපන්දු යවන ප්‍රමුඛතම ක්‍රීඩක ජස්ප්‍රිට් බුම්රා දණහිසේ ආබාධයක් හේතුවෙන් සංචිතයෙන් ඉවත් කිරීමට පියවර ගැනුණා.

ඒ අනුව බුම්රා වෙනුවට අකීබ් නබි සංචිතයට කැඳවීමට ඉන්දීය තේරීම් කමිටුව කඩිනමින් කටයුතු කළා. කෙසේ වෙතත් සායි සුදර්ශන් ලබා දුන් සුවිශේෂී දායකත්වය හමුවේ ඔහු ඉවත් වීමත් සමඟ ඇති වූ අඩුව පුරවා ගැනීමට තවමත් කිසිදු ආදේශක ක්‍රීඩකයෙකු නම් කිරීමට ඉන්දීය පාලක මණ්ඩලය පියවර ගෙන නැහැ. මෙය තරගාවලිය ආරම්භයට පෙර ඉන්දීය කඳවුර තුළ විශාල කතාබහක් මෙන්ම යම් පීඩනයක් ද නිර්මාණය කිරීමට සමත්ව තිබෙනවා.