හිටපු ජනපතිනි චන්ද්‍රිකා රජයට අනතුරු අඟවයි

වත්මන් රජය සුදුසුකම් හා පළපුරුද්දක් නොමැති පක්ෂ හිතවතුන් තනතුරුවලට පත් කරමින් රටේ ඉතිරිව පවතින රාජ්‍ය සේවය ද විනාශ කරමින් සිටින බවට හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මහත්මිය චෝදනා කරයි.

ඇය මේ බව සඳහන් කර ඇත්තේ සිය නිල ෆේස්බුක් ගිණුමේ සටහනක් තබමිනි.

හිටපු ජනාධිපති රනිල් වික්‍රමසිංහ මහතාගේ විදෙස් සංචාරයක අරමුදල් අනුමත කිරීමේ සිද්ධියකට අදාළව දැනට රක්ෂිත බන්ධනාගාරගත කර සිටින හිටපු ජනාධිපති ලේකම් සමන් ඒකනායක මහතා පිළිබඳව ඇය මෙහිදී විශේෂ අවධානයක් යොමු කර ඇත.

තමා ඔහු පෞද්ගලිකව හඳුනන බවත්, ඔහු ඉතා අවංක මෙන්ම ඉහළ වෘත්තීය මට්ටමක රාජ්‍ය නිලධාරියෙකු බවත් ඇය එහි සඳහන් කර තිබේ.

යුක්තිය පසිඳලීම තෝරාගත් පිරිසකට පමණක් සීමාවීම රටේ පාලන පද්ධතියට බරපතළ තර්ජනයක් බව ද ඇය අවධාරණය කරයි.

වෘත්තීය මට්ටමේ සහ අවංක රාජ්‍ය සේවයකින් තොරව රජයකට ඉදිරියට යා නොහැකි බව පෙන්වා දෙන හිටපු ජනාධිපතිනිය, දේශපාලන නායකයන්ට පරිපාලන පළපුරුද්දක් නොමැති වුවද ඔවුන්ට නොසැලෙන අවංකභාවයක් තිබිය යුතු බවත්, රට පාලනය කිරීමේදී වෘත්තීය නිලධාරීන් මත විශ්වාසය තැබිය යුතු බවත් වැඩිදුරටත් ප්‍රකාශ කර ඇත.