ලංකාවෙන් ‘ඔස්කාර්’ යවන්න ‘රිවර්ස්ටන්’ තෝරාගනී

ශ්‍රී ලංකාව නියෝජනය කරමින්, 2027 ඇකඩමි සම්මාන උළෙලේ අන්තර්ජාතික වෘත්තාන්ත චිත්‍රපට කාණ්ඩයට (International Feature Film) ඉදිරිපත් කරන සිනමා නිර්මාණය ලෙස ‘රිවර්ස්ටන්’ (Riverston) චිත්‍රපටය තෝරාගෙන තිබෙනවා.

නිලන්ත පෙරේරා සහ ලලිත් රත්නායකගේ තිර රචනයකට අනුව ලලිත් රත්නායක විසින් අධ්‍යක්ෂණය කළ මෙම චිත්‍රපටය, නිමන්ති පෝරගේ සහ ප්‍රභාත් රෝෂණ නිෂ්පාදනය කළ අතර, මහේන්ද්‍ර පෙරේරා, ශ්‍යාම් ප්‍රනාන්දු, ප්‍රියන්ත සිරිකුමාර, රන්දික ගුණතිලක සහ ආනන්ද කුමාර ඇතුළු පිරිසක් ඊට රංගනයෙන් දායක වුණා.

ශ්‍රී ලංකා ජාතික චිත්‍රපට සංස්ථාවේ මැදිහත්වීමෙන් පිහිටුවා ඇති, ඇමෙරිකා එක්සත් ජනපදයේ චිත්‍රපට කලා හා විද්‍යා ඇකඩමියේ අනුමැතිය හිමි ශ්‍රී ලංකා ජාතික ඔස්කාර් තේරීම් කමිටුව (NOSCSL) විසින් 99 වැනි ඇකඩමි සිනමා සම්මාන උළෙල නියෝජනය කිරීම සඳහා මෙම සිනමාපටය තෝරාගෙන ඇති බවයි සඳහන් වන්නේ.

වසර 100කට ආසන්න ශ්‍රී ලාංකේය සිනමා ඉතිහාසය තුළ රාජ්‍ය මට්ටමින් ඔස්කාර් සම්මාන උළෙල සඳහා මේ දක්වා නිල වශයෙන් චිත්‍රපටයක් ඉදිරිපත් කර නොමැති බවත්, මෙම ලැබෙන අවස්ථාව ලාංකීය සිනමා ඉතිහාසයේ ‍ඓතිහාසික අවස්ථාවක් වනු ඇති බවයි රාජ්‍ය චිත්‍රපට සංස්ථාවේ සභාපති සුදත් මහදිවුල්වැව සඳහන් කර සිටියේ.