පූසන් මාරාන්තිකයි! ප්‍රවේශම්වන්න!

ශ්‍රී ලංකාවේ බළලුන් හරහා ජලභීතිකා රෝගය සම්ප්‍රේෂණය වීමේ ප්‍රවණතාවක් දක්නට ලැබෙන බව සෞඛ්‍ය අමාත්‍යාංශයේ වසංගත රෝග විද්‍යා ඒකකය අනතුරු අඟවයි.

වසංගත රෝග විද්‍යා ඒකකයේ ප්‍රජා වෛද්‍ය උපදේශක වෛද්‍ය අතුල ලියනපතිරණ මහතා සඳහන් කරන්නේ, විශේෂයෙන්ම කොළඹ සහ ගම්පහ දිස්ත්‍රික්කවල බළලුන් සපාකෑමේ සිද්ධීන් තියුණු ලෙස ඉහළ ගොස් ඇති බවයි.

රසායනාගාර පරීක්ෂණ මගින් සත්ව මොළයේ සාම්පල විශ්ලේෂණය කිරීමේදී, බළලුන් අතර ජලභීතිකා රෝගයේ වර්ධනයක් පෙන්නුම් කරන බව වෛද්‍ය ලියනපතිරණ පෙන්වා දෙයි. බල්ලන්, බළලුන් පමණක් නොව ලේනුන් සහ මුගටියන් වැනි සතුන්ගෙන් ද මෙම මාරාන්තික රෝගය පැතිර යා හැකි බවත්, මෙය 100%ක්ම මාරාන්තික රෝගයක් බවත් හෙතෙම අවධාරණය කරයි.

සෞඛ්‍ය බලධාරීන් පෙන්වා දෙන තවත් විශේෂ කරුණක් වන්නේ, පසුගිය වසරේ වාර්තා වූ ජලභීතිකා රෝගීන්ගෙන් බහුතරයක් ආසාදනයට ලක්ව ඇත්තේ මහමග වෙසෙන බල්ලන්ගෙන් නොව, නිවාසවල ඇති කරන සුරතල් බල්ලන්ගෙන් බවයි. ශ්‍රී ලංකාවේ වාර්ෂිකව සුනඛ සපාකෑම් 250,000ත් 300,000ත් අතර ප්‍රමාණයක් වාර්තා වන බවට ගණන් බලා තිබේ.

ජලභීතිකා රෝගයෙන් ආරක්ෂා වීම සඳහා සුරතල් සතුන් නිසි පරිදි එන්නත් කරන ලෙසත්, සතෙකු සපා කෑ වහාම වෛද්‍ය උපදෙස් ලබා ගන්නා ලෙසත් සෞඛ්‍ය නිලධාරීන් මහජනතාවගෙන් ඉල්ලා සිටියි. ජලභීතිකා ආසාදනයෙන් ලොව පුරා දිවි ගලවාගෙන ඇත්තේ ඉතා සුළු පිරිසක් බැවින්, වැළැක්වීමේ පියවර ගැනීම අතිශයින්ම වැදගත් වේ.