ඉන්දියාවේ සිට ශ්‍රී ලංකාවට එන ගුවන් ටිකට්පත්වල ගාස්තු ඉහළට

ශ්‍රී ලංකාව සහ ඉන්දියාවේ සම සත්කාරකත්වයෙන් පැවැත්වෙන විස්සයි20 ලෝක කුසලාන ක්‍රිකට් තරගාවලියේ තීරණාත්මක ඉන්දු – පාකිස්ථාන තරගය හේතුවෙන් ශ්‍රී ලංකාව වෙත පැමිණෙන ගුවන් ටිකට්පත් මිල සීඝ්‍රයෙන් ඉහළ ගොස් තිබේ. විශේෂයෙන්ම ඉන්දියාව, පාකිස්ථානය සහ මැදපෙරදිග රටවල සිට කොළඹ බලා පැමිණෙන ගුවන් මගීන් මෙලෙස දැඩි අසීරුතාවයට පත්ව ඇති බව වාර්තා වේ.

තරගාවලිය සඳහා පාකිස්ථාන රජය සිය කණ්ඩායමට අවසර ලබා දීමත් සමඟ දෙරට අතර පවතින දැඩි ක්‍රීඩා තරගකාරිත්වය නැරඹීමට ප්‍රේක්ෂකයින් විශාල වශයෙන් ශ්‍රී ලංකාවට පැමිණීමට සූදානම් වීම මෙලෙස මිල ඉහළ යාමට ප්‍රධාන හේතුව වී ඇත. ඒ අනුව ඉන්දියාවේ සිට කොළඹ දක්වා වන ගුවන් ගමන් ගාස්තු සාමාන්‍ය මිල මෙන් තුන් ගුණයකට (300%) ආසන්න මට්ටමකින් ඉහළ ගොස් ඇති බව සඳහන් වේ.

විදෙස් මාධ්‍ය වාර්තා කරන පරිදි මුම්බායි, දිල්ලි සහ චෙන්නායි වැනි ඉන්දීය ප්‍රධාන නගරවල සිට කොළඹ බලා ක්‍රියාත්මක වන සියලුම සෘජු ගුවන් ගමන්වල ටිකට්පත් මිල ගණන් පාලනයකින් තොරව ඉහළ ගොස් ඇත. ව්‍යාපාරික පන්තියේ පමණක් නොව, පිරිමැසුම්දායක පන්තියේ (Economy Class) ගාස්තු ද සාමාන්‍ය මට්ටම ඉක්මවා ගොස් තිබීම විශේෂත්වයකි.

මෙවර විස්සයි20 ලෝක කුසලානය සඳහා කණ්ඩායම් 20ක් කාණ්ඩ 4ක් යටතේ තරග වදින අතර, ලෝක ක්‍රිකට් පිටියේ පසමිතුරන් ලෙස සැලකෙන ඉන්දියාව සහ පාකිස්ථානය ‘A’ කාණ්ඩයෙන් තරග වැදීමට නියමිතය.