හිටපු රාජ්‍ය ඇමැති වාහන හයක් අරන් ගිහින්

හිටපු කෘෂිකර්ම රාජ්‍ය ඇමැතිවරයකු තම පාවිච්චිය සඳහා ගෙන තිබූ වාහන හයක් තවමත් භාර නොදීම නිසා එම අමාත්‍යාංශය වාහන අර්බුදයකට මුහුණ පා සිටින බව අනාවරණය වේ.

හිටපු කාෂිකර්ම රාජ්‍ය ඇමැතිවරයාට අනුයුක්ත කරන ලද වාහන තුනක් සහ ඔහුගේ කාර්ය මණ්ඩලයට නිකුත්ක කරන ලද වාහන තුනක් මෙලෙස භාර දී නැත.

මෙම දේශපාලනඥයා කෘෂිකර්ම රාජ්‍ය ඇමැතිවරයකු ලෙස කටයුතු කරමින් සිටියදී ජනාධිපතිවරයා විසින් වෙනත් අමාත්‍යාංශයකට පත් කළේය. එහිදී අදාළ රාජ්‍ය ඇමැතිවරයා සහ ඔහුගේ කාර්ය මණ්ඩලය විසින් ඉහත අංක දරන වාහන හය කෘෂිකර්ම අමාත්‍යාංශයට භාර නොදී එම රාජය අමාත්‍යාංශයට රැගෙන ගොස් තිබේ.

මෙම වාහන භාර දෙන ලෙස කෘෂිකර්ම අමාත්‍යාංශය විසින් ඉකුත් වසරේ (2021) ජූලි මස 23 වැනිදා මෙකී රාජ්‍ය ඇමැතිවරයාගේ පුද්ගලික ලේකම්වරයාට හා මෙම වසරේ මැයි මස 05 වැනිදා අදාළ රාජ්‍ය අමාත්‍යාංශයේ ලේකම්වරයාට ලිඛිතව දැනුම් දී ඇතත් මෙතෙක් එම වාහන භාරදී නැත.