එක්සත් ජාතික පක්ෂයේ හිටපු සංවිධායකට පොලීසියේ ලොකු පුටුවක්

යහපාලන රජය සමයේ, එක්සත් ජාතික පක්ෂයේ මහර ආසන සංවිධායකවරයා ලෙස කටයුතු කළ, හිටපු පොලිස් මාධ්‍ය ප්‍රකාශක ප්‍රිශාන්ත ජයකොඩි බස්නාහිර පළාත් අපරාධ දිසාව භාර නියෝජ්‍ය පොලිස්පතිවරයා ලෙස පත් කර තිබෙනවා. 
 
මහජන ආරක්ෂක අමාත්‍යාංශයේ ලේකම්වරයාගේ අනුමතියට යටත්වයි පොලිස්පතිවරයා විසින් මෙම පත්කිරීම සිදුකර ඇත්තේ. 
 
හිටපු පොලිස්පතිවරයා ලෙස එන්.කේ ඉලංගකෝන් කටයුතු කරන සමයේ ද ප්‍රිශාන්ත ජයකොඩි මධ්‍ය ප්‍රකාශකවරයා ලෙස කටයුතු කර තිබෙනවා. 
 
කෙසේ නමුත් ජ්‍යෙෂ්ඨ පොලිස් අධිකාරීවරයෙක් ලෙස කටයුතු කළ ප්‍රිශාන්ත ජයකොඩි
රත්නපුර ජ්‍යෂ්ඨ පොලිස් අධිකාරීවරයා ලෙස කටයුතු කළ අතර එවක දී මරණ තර්ජන එල්ල
වූවා යැයි පවසමින් ඔහු දේශපාලන රැකවරණය පතා ඔස්ට්‍රෙලියාව බලා පිටත්ව ගොස් කළක් එහි ජීවත්ව තිබෙනවා. 
 
එකී සිද්ධියෙන් අනතුරුව 2013 අගොස්තු මාසයේ දී එවක පොලිස් අධිකාරීවරයෙකු ව සිටි ප්‍රිශාන්ත ජයකොඩි සේවය හැර ගියා සේ පොලිස් දෙපාර්තමේන්තුව විසින් සලකා ඇතැයි ද වාර්තා වනවා. 
 
අනතුරුව නැවත මව්බිමට පැමිණි ඔහු එක්සත් ජාතික පක්ෂය සමග දේශපාලන කටයුතුවල
නියැලුණු අතර වත්මන් ජනාධිපති රනිල් වික්‍රමසිංහ අග්‍රාමාත්‍යවරයා ලෙස කටයුතු කළ
2016 – 2019 සමයේ දී එක්සත් ජාතික පක්ෂයේ මහර ආසන සංවිධායකවරයා ලෙස ද කටයුතු කර තිබෙනවා. 
 
පසුව මැතිවරණයට තරග කළ ප්‍රියශාන්ත ජයකොඩි, දේශපාලන පළිගැනීමේ ලැයිස්තුව යටතේ යලිත් පොලිස් සේවයට එක් වී තිබෙනවා. 
 
එපමණක් නොව ඉකුත් ජනාධිපතිවරණ සමයේ ජනාධිපති අපේක්ෂකයෙකු වූ වත්මන් විපක්ෂ නායක සජිත් ප්‍රේමදාසගේ ආරක්ෂාව භාරව කටයුතු කළ නිලධාරියා ලෙස ද ප්‍රිශාන්ත ජයකොඩි කටයුතු කළ බවටයි වාර්තා වන්නේ. 
 
දැනට නියෝජ්‍ය පොලිස්පතිවරයෙක් දක්වා උසස් වීම් ලබා සිටින ප්‍රිශාන්ත ජයකොඩි,
බස්නාහිර පළාත් අපරාධ දිසාව භාර නියෝජ්‍ය පොලිස්පතිවරයා ලෙස පත් කර තිබනවා.