වනිදු ඇතුළු ශ්‍රී ලංකා ක්‍රීඩකයින් ශ්‍රේණිගත කිරීම්හි ඉදිරියට

ජගත් ක්‍රිකට් කවුන්සලය විසින් සිය නවතම ක්‍රීඩක ශ්‍රේණිගත කිරීම් අද(22) නිවේදනය කළා.

නවතම ‍ශ්‍රේණිගත කිරීම්හි ශ්‍රී ලංකා ක්‍රීඩකයින් කැපී පෙනන අයුරින් ඉදිරියට පැමිණ තිබෙනවා.

ඊයේ(21) තරගයේ දී ලකුණු 110ක් වාර්තා කරමින් තරගයේ වීරයා සම්මානයෙන් ද පිදුම් ලැබූ ශ්‍රී ලංකා මැද පෙල පිතිකරු චරිත් අසලංක ස්ථාන 19කින් ඉදිරියට පැමිණ ඇති අතර, ඔහු මේ වන විට එක්දින පිතිකරණ ශ්‍රේණිගත කිරීම්හි 32 වැනි ස්ථානයේ රැඳී සිටිනවා.

ධනංජය ද සිල්වාද ස්ථාන 12කින් ඉදිරියට පැමිණ ඇති අතර, ඔහු මේ වන විට පිතිකරණ  ශ්‍රේණිගත කිරීම්හි 69 වැනි ස්ථානයේ පසුවනවා.

එමෙන්ම ඔහු පන්දු යවන්නන් අතර 61 වැනි ස්ථානය දක්වා ද ස්ථාන 11කින් ඉදිරියට පැමිණ තිබෙනවා.

මේ අතර, 20යි 20 ශ්‍රේණිගත කිරීම් පිතිකරුවන් අතර 8 වැනි ස්ථානය දක්වා එක් ස්ථානයකින් ඉදිරියට පැමිණීමට පැතුම් නිස්සංක සමත් වී තිබෙනවා.

වනිදු හසරංග 20යි 20 පන්දු යවන්නන් අතර 6 වැනි ස්ථානය දක්වා එක් ස්ථානයකින් ඉදිරියට පැමිණ ඇති අතර, මහීෂ් තීක්ෂන එහි තවදුරටත් 8 වැනි ස්ථානයේ රැදී සිටිනවා.